Jácome pide "explicacións" pola "comisión" que unha empresa de Ourense "cobra aos traballadores"
O comité denuncia que os empregados contratados o fin de semana pagarían "un recibo de 23,50 euros mensuais e o resto de 63 euros".
- O Concello de Ourense pedirá un informe técnico da rede de sumidoiros para "paliar" as consecuencias das treboadas
- Jácome condiciona a obra da Praza de Abastos a unha prórroga da subvención de Fomento, que ve "perdida"
Por E.P. | SANTIAGO DE COMPOSTELA | 16/07/2019 | Actualizada ás 17:42
O alcalde de Ourense, Gonzalo Pérez Jácome, pediu "explicacións" este martes polas "prácticas levadas a cabo á hora de contratar pola empresa Ecourense", da que os sindicatos denunciaron que os traballadores contratados a través dunha empresa de traballo temporal deban pagar "un recibo" de 23,50 euros ao mes no caso de traballar o fin de semana e 63 euros ao mes o resto.
Así llo trasladaron durante unha reunión mantida na alcaldía co secretario comarcal da CIG, Anxo Pérez Carballo, e con membros do comité de Ecourense. De confirmarse este extremo, Jácome falou de "prácticas totalmente mafiosas".
O alcalde de Ourense asegurou que neste caso se dan dúas vías de contratación: "o 50% entran ao libre albedrío dos xefazos, e o outro 50% mediante unha empresa de emprego temporal radicada na Coruña". Precisamente sería esta segunda modalidade a que levaría consigo o pago de "unha cota de comisión", dixo.
A este respecto, o rexedor ourensán aludiu que "van indagar se se trata dun procedemento legal ou non", xa que o ve "un imposto revolucionario". Ademais, tamén referiu que a prestación do devandito servizo caduca o día 31 de marzo de 2020 e que "están pendentes da súa remunicipalización ou dunha prórroga".
