A Policía non ve "prudente" aínda cualificar de violencia de xénero a agresión a varias mulleres na Coruña

Asegura que debe ser o xuíz quen o ditamine e o delegado do Goberno di que "polo momento" non está finalizada a investigación.

Por Europa Press / Redacción | A CORUÑA | 17/07/2019 | Actualizada ás 14:52

Comparte esta noticia

A Policía Nacional investiga as denunciadas presentadas pola agresión dun home a varias mulleres este martes na porta dun local de lecer situado na rúa Sol da Coruña, no barrio do Orzán. Con todo, o xefe superior de Policía de Galicia, Manuel Vázquez, non ve "prudente" pronunciarse sobre se o caso pode considerarse ou non violencia de xénero.

"Está a facerse unha investigación sobre os feitos e estase tomando declaración a testemuñas", confirmou a preguntas dos xornalistas tras participar, xunto co delegado do Goberno, Javier Losada, no recibimento de 154 alumnos de policía que inician este martes a súa formación.

Así, o xefe superior deste corpo en Galicia dixo que non ve "prudente" a cualificación como violencia de xénero deste episodio, posto que "aínda non pasaron as dilixencias á autoridade xudicial. Será o xulgado quen o ditamine".

En calquera caso, o Xefe Superior de Policía considerou que o ocorrido este martes ante o local de lecer "está claro", pois había testemuñas que viron o sucedido. Por tanto, confía en que "en breve" estean terminadas as dilixencias policiais para que poidan ser remitidas ao xulgado.

"As denuncias están a tramitarse e avaliando. Polo momento non hai finalizada a liña de investigación", dixo o delegado do Goberno, quen, a pesar de considerar que A Coruña "é unha cidade segura", pediulle aos novos policías en prácticas un "esforzo extra" para loitar contra a violencia machista.

DETIDO EN MONFORTE

Á marxe desta cuestión, preguntado polo detido en Monforte acusado de roubo con violencia e detención ilegal dunha muller coa que supostamente mantivera relacións sexuais previas, o delegado do Goberno confirmou que "hai unha persoa detida" por mor dunha denuncia por agresión sexual e secuestro.

Polo momento, asegura, está a investigarse o sucedido para presentar dilixencias ao xulgado en relación aos feitos ocorridos na madrugada do martes, cando o detido contratou os servizos dunha muller para manter relacións sexuais e levouna a un local comercial da súa familia, onde a deixou encerrada ata que, ante os berros da vítima, lle abriu a porta.

Ao fío deste último suceso, Losada quixo lembrar que "este ano se incrementaron un 17 por cento as denuncias en agresións sexuais" e, por iso, durante a súa intervención, pediu aos novos policías en prácticas un "maior compromiso" na loita contra a violencia de xénero.

Axente da Policía Nacional. POLICÍA NACIONAL
Axente da Policía Nacional. POLICÍA NACIONAL

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta