Por E.P. | SANTIAGO DE COMPOSTELA | 19/07/2019 | Actualizada ás 18:01
A familia do mariñeiro morto o pasado 20 de decembro en Malpica (A Coruña) recolleu 10.000 sinaturas que impulsaron unha iniciativa no Parlamento galego para que Portos de Galicia, dependente da Consellería do Mar, incremente a seguridade no peirao de vila.
A recollida de firmas foi presentada este venres na sede coruñesa de Portos de Galicia pola familia do falecido, acompañada do patrón maior de Malpica e a deputada de En Marea Flora Miranda.
Segundo o grupo parlamentario de En Marea, o obxectivo desta iniciativa —xa aprobada por unanimidade— é "acometer os labores de seguridade necesarias" para "evitar que se produzan novos accidentes" na dársena de Malpica, dadas as fortes correntes do embarcadoiro.
En aras de dar solución á situación, Portos de Galicia informou que está a estudar "o efecto e a intensidade" das correntes que se crean no dique para "avaliar cales son as actuacións máis adecuadas" para mellorar as "condicións de acceso e saída" das embarcacións.
Desta forma, o ente público determinará a orixe das correntes que se producen e comprobará os efectos das ondas longas asociadas aos temporais. En concreto, estudarán a súa intensidade, amplitude e as medidas que poden reducir as súas consecuencias.
Por agora, os expertos encargados do estudo barallan distintas posibles solucións: gañar calado a través de rebaixar a canle de acceso nas comportas, eliminar os rebordes que distorsionan as correntes, ampliar o martelo do espigón ou construír un contradique.
Con todo, Consellería do Mar sinalou aínda debe analizar a complexidade dos trámites e o impacto das hipotéticas actuacións. Por esta razón, a presidenta de Portos de Galicia, Susana Lenguas, reunirase co patrón maior de Malpica a próxima semana para abordar a situación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.