Despois de detido o presunto responsábel do roubo que máis expectación espertou entre a poboación neste último ano, o Códice Calixtino, a guía que lles servía aos peregrinos na Idade Media para o seu percorrido do Camiño de Santiago, a TVG está a preparar unha tv-movie que leve á pantalla este feito que reúne todos os ingredientes para unha ficción.

O entre informa que a directora da Televisión de Galicia, Rosa Vilas, e o director de Programación da canle pública galega, Fernando Madriñán, están a preparar o proxecto para a elaboración dunha película para televisión sobre o roubo. Con este propósito, os responsables da Galega encargaron xa os primeiros estudos técnicos sobre o formato que tería a produción.

A cousa aínda está verde. "Polo momento tamén se está a avaliar o xénero que desenvolverá a ficción, desde unha biografía, un biopic, ou unha historia de intriga, en consonancia coa esencia do suceso", di a TVG.

O equipo de Programación da TVG estuda diversas alternativas mentres busca fórmulas de financiamento do proxecto.