A pesar de que a empresa deixará corresponsais nas dúas cidades o certo é que esta situación pon na rúa a máis de 10 traballadores, que xa se suman os máis de 30 que nos últimos meses tamén tiveron que deixar os seus postos de traballo en medios de toda Galicia, ben despedidos, ben por efectos da crise.

A decisión de EFE de converter aos seus corresponsais en TRADE (autónomos dependentes), co que verán tremendamente recortado o seu salario, tamén afectou aos traballadores galegos. Algúns abandonaron a axencia e dous deles decidiron denunciala logo de negarse a asinar os documentos para acreditarse como TRADE ou como informador colaborador. A dirección de EFE alega que non foron despedidos, senón que non queren seguir na axencia.

A crise está a bater forte nos medios galegos. Os traballadores do Diario de Pontevedra (do grupo El Progreso) negocian renunciar ás pagas extras para evitar despidos, no Xornal de Galicia despediron a tres comerciais e reduciron os días de libranza ao mes e en La Voz negocian xubilacións anticipadas. Os problemas laborais tamén afectan a La Región, Faro de Vigo e ao Grupo La Capital e, principalmente, a pequenos canais de radio e televisión (como localia) e gabinetes de comunicación. A propia Xunta ten xustificado o aumento das axudas aos medios para evitar despidos ou peches, a pesar de que é unha situación que apoiou e incrementou nos últimos anos sen ningún tipo de criterio laboral. Unha crise que ten mobilizado, ademáis, aos xornalistas.