A crise está facendo estragos entre os deportistas galegos, ou polo menos, esa é a excusa que está poñendo a Xunta para reducir as axudas ou para non celebrar eventos deportivos, como o partido da selección galega de Futbol.

A Fundación Galega para o Deporte excluíu das axudas desta ano a un importante número de deportistas de élite. Así, o regastista Carlos Paz Blanco, que foi Campeón de España de Platú 25, non obtivo subvención este ano, fronte aos 9.000 euros que percibiu en 2008. Tampouco recibe nada o piloto Celso Míguez, líder da European F-3 Open, que pasa de 14.711 euros en 2008 a nada en 2009 -- unhas axudas que conserva, sen embargo, o piloto José Luis Abadín Iglesias, con case 14.000 euros--.

Medallistas olímpicos

Na mesma situación está Fernando Echevarri, ouro en Pekín na modilade de Tornado, que pasa de 13.174 a nada ou o campión en triatlón, Francisco Javier gómez Noya, que obtivo 18.663 euros o pasado ano. Tamén Eva Castro, 3ª na copa do Mundo de 4X, terceira no Campionato de Europa e 9 veces campiona de España, queda sen nada logo de recibir 12.000 euros os tres últimos anos.

Os recortes tamén chegan a outros deportistas de élite coma Carlos Pérez Rial, Perucho, medalla de ouro en Pekín e no campeonato europeo,  que pasa  de 4. 655 a 4.131 euros.ou o regatista Roberto Bermúdez de Castro que pasa de case 13.000 euros a 5.143.

Asociacións deportivas

No lado oposto atopanse asociacións deportivas que durante o bipartito non recibiron nada ou cantidades pequenas e que neste exercicio incrementan notablemente a súa subvención. É o caso do Club AMFIV de baloncesto, presidido por Pablo Beiro, quen foi varias veces nas listas do PP, e que recibiu 2.750 no 2007, nada no 2008 e 22.201 euros este ano.

Tamén Logística del Deporte, la Cultura y el Ocio SL de Lugo, que non recibe nada en 2008 dispón en 2009 de 21.358 euros. Esta é unha empresa adicada á "organización y gestión de eventos, de ocio, deportivas, bienestar social, culturales y organización de pruebas deportivas y eventos en general". O Club Marítimo Deportivo San Martiño, do Grove, que non conta con páxina web, tampouco recibiu nada nin en 2007, nin en 2008, e este ano  obtén 16.802 euros.
Outras entidades deportivas tamén aumentan as súas subvencións como o Real Club Nautico da Coruña, que pasa de 5.416 a 17.143 euros ou a Escudería Automobilística Ferrol ou a Escudería Ourense que pasan de 14.931 de 2007  a 15.416 de 2008 e a 15.456 euros en 2009, respectivamente.

Pola súa banda, a outras asociación de recoñecido prestixio reduceselle, aínda que pouco, a subvención como é o caso do Clube Naútico Castrelo de Miño, que pasou  de 8.000 euros en 2007, a máis de 17.273 en 2008 e a 16.500 en 2009. Este clube organiza a Copa da Xuventude de remo en 2012. Tamén se lle reduce 100 euros as axudas a S.D. Tirán, campión de Galicia de traineiras, pasando de 16.395 a 16.300 euros.