Xosé Luis Méndez Ferrín nunca tivo pelos na lingua, nin antes coma literato, profesor e activista político, nin agora coma presidente da RAG. Di o que pensa e asegura que non o vai a deixar de facer logo do seu nomeamento na Academia, sempre co máximo respecto aos seus académicos. Con todo, é un home comedido e non quere entrar a respostarlle ao presidente da Xunta, quen a pasada semana recomendoulle que deixe o seu "pasado político" e que "fale menos e defenda o galego".

E posto que se trata de defender o galego, o presidente da RAG amosase encantado. Nunha conversa con Galicia Confidencial, Ferrín suliña que, nesta cuestión, xa non hai máis que dicir porque todas as institucións "se pronunciaron", logo de que o fixera esta mesma semana o Consello da Cultura Galega cun posicionamento, tamén, crítico. "Non hai máis nada que quitar ou engadir porque o Goberno galego está só ante a sociedade e mesmo tamén ten problemas dentro do seu partido con alcaldes que votan en contra do decreto", asegura.

"Lesivo e reaccionario"

Por iso, salienta que o decreto é "lesivo e reaccionario" e foi un "erro" e unha "imprudencia" promulgalo nestes momentos. "O goberno non ten unha maioría tan esmagadora como para tomar esta decisión porque lle pete". "Pero ten a maioría silenciosa", retrucamoslle. "Esa maioría pode ser a do goberno ou a dos que están preparando unha revolución... A maioría pode ser de quen queira, se está calada. Esa é unha frase feita, norteamericana, e se repite cando non se ten xa máis nada que dicir e non se teñen argumentos. Antes se dicía iso de que 'Dios está comigo'".

Por iso, para Ferrín o que conta é o que di a sociedade que se manifesta e asegura que hai unha "gran reacción popular" que "non son só é nacionalista". Obviamente, puntualiza que os galegos están moi preocupados polas cousas persoais, coma o paro, pero tamén "lles interesan outras cousas", coma é o novo decreto do galego.

Retirar o decreto

E vista a resposta da xente, o presidente da RAG, ten claro o que debe de facer o Executivo de Feijóo; retirar o decreto. E é que ve a proposta de Feijóo de enmendar a norma para que haxa un 50% de galego e de castelán como "declaracións para os xornais". "A miña idea é que debe renunciar a el. Tampouco sería a primeira vez que se fai", asegura. E pon exemplos; a destitución do ministro de Educación de Francia durante o Goberno de Jacques Chirac tras a mobilización da sociedade e dos estudantes por querer impoñer unha nova lei de educación. "Logo Feijóo tería que destituir ao conselleiro?", preguntamos. "Non pode destituir a Xesús Vázquez porque foi Feijóo quen levou esta cuestión e non delegou. El é o responsable directo".

Pero tampouco aclara se Feijóo debe dimitir. En todo caso, asegura que o mellor que pode facer é "renunciar" a este decreto e poñer en vigor o anterior que se baseaba na Lei de Normalización Lingüística, "aprobada por todos os grupos, incluído o PP". E se non o fai xa aventura o que pode pasar. "Vai a ter problemas e nós non buscamos ese problema", advirte.

"Modelo de Madrid"

"Isto non o suscitou ningúen e a maioría estaba dacordo co decreto anterior", indica ao tempo que lembra que houbo un "cambio radical". Un cambio , di, que terá que explicar o PP porque está a aplicar "modelos que se impoñen desde Madrid". "Antes, con Fraga o PP galego tiña certa soberanía". Unha argumentación que utiliza tamén o sector "galeguista" do PPdeG.