"O que está claro é que o PSOE non ten vontade de resolver isto e así non se pode facer nada", apuntan fontes do Executivo galego que acusan directamente a José Blanco de torpedear a fusión das caixas. "E logo está Pachi Vázquez que é unha comparsa e fai o que lle di pepiño e o alcalde de Vigo", ironizan sobre a actuación que o máximo líder do PSdeG está tendo neste asunto.

Por iso, consideran que Vázquez "non é un interlocutor válido" e queren falar directamente con Blanco, ainda que critican que o ministro de Fomento está evitando en todo momento un contacto con membros da Xunta. Por iso, hoxe Feijóo foi claro e acusou tanto a Pachi Vázquez como a Blanco de ir en contra dos intereses dos galegos. "Lamento que algún responsable do Goberno de España non teña tempo para negociar con Galicia, en días laborables, e si teña tempo as fins de semana, a través dos mítines, para intentar diminuír as capacidades financeiras que ten a nosa comunidade”, dixo de Blanco. Máis duro foi con Vázquez, "como galego lamento profundamente que dirixentes políticos de Galicia acudan a Madrid para boicotear a Galicia, para ver cómo prexudican mellor a Galicia”.

A culpa non é de Feijóo

Logo do Consello da Xunta, Feijóo insistiu en que seguirá traballando con "todas as armas legais" para que se aprobe a Lei de Caixas. Sen embargo, no seu entorno comezan a tirar a toalla e aseguran que hai unha intención clara do Goberno de Zapatero e, principalmente, de José Blanco de que fracase a fusión. Por iso, comezan a preparar o terreno e apuntan que as culpas e as responsabilidades hai que buscalas en Madrid. O propio presidente galego asegura que, se fracasa a fusión, el non é o responsable.

O PP de Madrid, en contra

Tampouco xoga a favor de Feijóo a posición do PP de Madrid que é partidario das fusións interrexionais e se amosa reticente coas integracións de caixas dunha mesma comunidade. De feito, o presidente galego botou hoxe balóns fora e asegurou que a súa postura é a mesma que mantén o PP de Madrid. Unha opinión que tamén tentou trasladar Dolores de Cospedal. Con todo, desde Génova xa alertaron á Xunta que hai que "unificar" mensaxes e "non insistir" na idea de crear "unha gran caixa galega". "Son mensaxes que en Madrid levan a confusión xa que din que levan un tufillo nacionalista e antiliberal".

Moitas son as complicacións que se lle están acumulando ao presidente galego xusto cando cumpre un ano da súa victoria electoral. Polo momento, as dúas grandes bazas políticas deste primeiro ano de goberno están resultando un verdadeiro problema; a fusión das caixas galegas e o novo decreto do galego no ensino.