As diverxencias veñen de lonxe pero a tensión foi a máis e estalou tras o anuncio da empresa pública de convocar unha oferta de emprego público (OEP) de 220 prazas polo sistema selectivo de concurso oposición. Un anuncio que os traballadores contratados interpretaron como un pacto entre a dirección da CRTVG e o Comité Interempresas xa que a modalidade elixida é o concurso oposición e non o concurso de méritos como piden a maior parte deles e porque o número de prazas está lonxe dos mais de 500 que se prometeran.

Por iso, e logo de asambleas e reunións frustradas co actual comité, os traballadores contratados, co asesoramento da CUT, teñen iniciado unha serie de protestas encamiñadas a convocar novas eleccións sindicais.  Tampouco descartan unha folga se comité e dirección non poñen en marcha medidas alternativas para manter no seu posto aos máis de 300 contratados que non poderán facerse cunha praza.

Esta é a segunda vez que os traballadores piden a o cese do Comité Interempresas. Hai pouco máis dun ano un grupo de traballadores, tamén asesorados pola CUT, presentaron na Oficina de Rexistro Público da Delegación Provincial da Consellería de Traballo da Coruña máis sinaturas das precisas para iniciar o proceso de revogación do Comité de Empresa da televisión autonómica conforme establece a lei. O proceso paralizouse coa entrada do novo goberno e reactivouse unha vez que a nova Xunta decidiu convocar un OEP.

“Consolidacións” sen exame

Pola súa banda, os membros do Comité intercentros (CIG, UGT, CC.OO e USO) acusan á CUT e a moitos dos contratados de buscar “un proceso de consolidación no que unicamente o persoal da casa acceda aos postos de traballo”. Así, din que esta reclamación que non se axusta ás normas de acceso ás empresas públicas, nomeadamente o principio de igualdade.

Ademais critican que estes traballadores e á CUT dirixan a súa frustración contra eles “cando foi o PP quen lles creou expectativas de acceso aos postos fixos que agora non pode cumprir”. “Sorprende tamén que non sexa a Dirección o branco das súas críticas cando está na súa man calquera posibilidade de modificación ou aumento das prazas ofertadas e cando é un dos dos piares nos que se sustenta o acordo final sobre a OEP”, apuntan nun comunicado.

O Comité Interempresas tamén responsabiliza a algúns sectores  da  dirección de promover a actual situación de conflitividade no ente público porque “só busca deslexitimar a representación sindical e  favorecer un contexto que lle permita botar abaixo o convenio colectivo e precarizar as condicións laborais dos traballadores”.

Cifras

Segundo datos da empresa, o número total de contratos temporais na CRTVG é de 443, 125 son contratos de interinidade celebrados para substituír traballadores con dereito a reserva de posto de traballo (baixas por enfermidade, licenzas e suspensións de contratos), 17 de prácticas e 12 de revecemento (celebrados para cubrir postos de traballadores acollidos á xubilación parcial). Por iso, o comité intercentros asegura que “pola súa propia natureza, estes non poden ser obxecto de consolidación, e a súa continuidade non depende da execución da OEP”.

Dos 289 contratos cubertos temporalmente na modalidade de interinidade en vacante de OEP (124) e de obra ou servizo determinado (165),  220 son os que se consolidarían coa execución da OEP. Os 69 contratos restantes, a empresa vincúlaos con programas non permanentes na grella da TVG e a RTG que teñen autonomía e substantividade propia e que xustificarían senllos contratos de obra ou servizo determinado. “Por iso tampouco estes contratos dependería da realización da OEP, senón da permanencia en emisión dos programas que os motivan”, di o comité.

***********************************
Documento remitido pola Dirección da División de RR.HH. aos traballadores este luns:

En relación coa recente sentenza do Tribunal Supremo relativa á legalidade ou non dunha cláusula do Convenio Colectivo da Radio e Televisión de Andalucía que establece a posibilidade, con carácter excepcional, de novar os contratos de traballo temporais e transformalos en fixos, é importante salientar que esta solución non podería prosperar na actualidade xa que suporía unha vulneración do artigos 55, 61 e da Disposición Transitoria  4ª da Lei 7/2007 do Estatuto do Empregado Público, do artigo 103.3 da Constitución Española e do artigo 10 da Lei da Función Pública de Galicia, por non cumprirse os principios reitores do acceso ao emprego público, máxime cando se indica expresamente no artigo 10.4 da Lei da Función Pública de Galicia que a Administración non poderá converter en fixa ou indefinida unha relación laboral de carácter temporal.
Sendo isto así, a única solución posible á precariedade da  contratación temporal é unha oferta de emprego público de 220 prazas polo sistema selectivo de concurso oposición, único que garante xuridicamente o proceso, avaliando ao máximo legal posible os méritos dos profesionais que levan anos demostrando a súa valía na empresa e utilizando para ilo a consolidación de emprego temporal prevista na Disposición Transitoria  4ª da Lei 7/2007 do Estatuto do Empregado Público.