Na rolda de prensa posterior ao Consello da Xunta, Feijó criticou a socialistas e nacionalistas por "politizar unha foto", en referencia as instantáneas nas que Javier Guerra está caracterizado de ama de casa e Beatriz Mato de home de negocios.

"Quedan moitos prexuizos existentes que hai que eliminar e ese era o obxectivo do acto", dixo o presidente galego en relación á conmemoración do Día da Muller no que participaron os membros do Executivo galego. Por iso, acusou á oposición de non entendelo. "Facendo un recordatorio tería que dicir iso de cando o sabio sinala a lúa, o tonto sinala o dedo", engadiu.

Un acto do "artista"

Así, recordou que o "artista" que desenvolveu ese acto xa se manifestou e xa dixo que o que tentaba facer era, precisamente, denunciar a existencia na sociedade actual de divisións en función dos roles masculino ou feminino. "Por iso, e por respecto a esa iniciativa, -- os conselleiros-- seguiron nesa actitude", indicou.

Deste xeito,  volveu cargar contra PSdeG e Bloque por "politizar" esa foto e non "dicir nada" doutras fotos "máis escandalosas", en alusión ao secretario de Estado de Cooperación Territorial, Gaspar Zarrías --encargado das negociacións sobre a Lei de Caixas--, "que se adica a aprender galego os fins de semana" en vez de "manter o principio de igualdade entre institucións".