É é que tanto Pachi Vazquez coma Alberto Núñez Feijóo se enteraron case ao mesmo tempo da maniobra do novo presidente do PP de Ourense. Manuel Baltar comparecía este xoves acompañado de Eladio Fernández, ex coordinador provincial e ata fai pouco home da confianza de Pachi Vázquez, para anunciar a súa integración nas filas do Partido Popular.

Baltar Blanco buscaba, desde fai tempo, dar un golpe de efecto logo da súa victoria no Congreso do PP de Ourense. "Quere que en Santiago saiban quen é o que manda na provincia", aseguran dirixentes próximos ao presidente provincial que din que as súas accións van encamiñadas a manter e, mesmo superar, as espectativas electorias do seu pai na provincia durante os últimos anos.

E para conseguir este obxectivo vale calqueira cousa, mesmo convencer aos adversarios políticos. "Fernández non será o único, hai máis xente do PSOE e do BNG dispostos a mudar a un proxecto gañador", din estes dirixentes. Unhas "fichaxes" que tampouco son unha novidade no PP de Ourense. Antes que Fernández xa se pasaron ao PP outros alcaldes do PSOE, como o de Negreira de Ramuín e tampouco se descarta que tamén acabe neste partido o histórico alcalde de Rairiz de Veiga, que sempre foi da man do BNG e que, desde as pasadas autonómicas, exerce como independente.

Na dirección do PPdeG non acaban de convencer as prácticas de Baltar e, polo momento, prefiren agardar para dar o seu consentemento público. Con todo, desde Ourense aseguran que non hai diferencia ente o que fai Baltar e o que está facendo Rafael Louzán en Pontevedra. "Se se trata de traer votos ao partido logo pronto calan", din os dirixentes consultados.

Feijóo, "non coñece" a operación

"Descoñezo a concrección desa noticia. Saben que as valoracións sobre o PP nas roldas de prensa do Consello vou tentar absterme durante o tempo que estea na Xunta. De confirmarse esa noticia pois el adoptará esa decisión e o señor Vázquez buscará unha explicación. Nin coñezo con detalle esa información nin creo que me deba pronunciar", esa foi a escueta resposta de Núñez Feijóo na rolda de prensa posterior ao Consello da Xunta.

O presidente galego estaba sobre aviso dunha "operación" en Ourense pero descoñecía, realmente, do que se trataba. Tampouco sabía nada Pachi Vázquez, a quen a noticia sorprendeu sobremaneira, igual que ao coordinador provincial do PSOE de Ourense, Raúl Fernández. As negociacións entre Baltar e Fernández levaronse tan en segredo que os socialistas tardaron en reaccionar á nova.

"É un home que ten moitos problemas persoais e o PP aproveitouse diso", din fontes do PSdeG que din que Fernández estaba pasando por un mal momento logo da morte, en pouco espacio de tempo, da súa muller, do seu pai e dun fillo. "Baltar aproveitase da miseria humana para comprar vontades a golpe de chequeira", apuntan.

Con todo, os principais obxectivos dos populares ourensáns está conseguido; minar o poder do líder do PSdeG no seu bastión e mandar un recado a Santiago para que vexan que en Ourense seguen mandando os Baltar.