Finalmente, e logo das presións de certos sectores do BNG, o Consello Político de Máis BNG decidiu mudar o nome co que se bautizaron na política nacionalista para evitar suspicacias e malentendidos cos seus colegas do Bloque. E optaron por algo semellante e sinxelo para os seus militantes: Máis Galiza.

"Ao final foi o nome máis axeitado que atopamos. Tampouco lle demos moitas voltas. Mantemos o + e incluimos Galiza que é a nosa nación, o noso país e que, por estensión, nos engloba a todos", apunta un dirixente desta formación. "Nin deterxentes, nin bebidas enerxéticas. O noso é Máis Galiza por e para Galiza", ironiza.

Ninguén é o pai

No colectivo que lidera Carlos Aymerich ninguén quere ser o pai da criatura. "Igual que Máis BNG naceu de xeito espontáneo, tamén o fixo Máis Galiza", asegura.

Este grupo decidiu cambiar de nome logo de que  EI e, especialmente, a UPG, criticaran en varias ocasións que o uso de 'BNG' poidera causar confusión entre os militantes e a propia sociedade galega. Un debate no que chegou a intervir o propio voceiro nacional, Guillerme Vázquez. Por iso, e para evitar máis amonestacións, os integrantes de Máis BNG decidiron no consello do pasado xoves denominarse oficialmente Máis Galiza. O logo será '+G'. Unha proposta que non convence a todos. Algúns reclaman que xunto ao g se inclúa tamén o z de GZ pero saiu elixida por ampla maioría a primeira opción.

Quintana

Por outra banda, na xuntanza do pasado xoves, e tal e como xa adiantamos en GC en xaneiro, Máis BNG decidiu que se absterá na votación que terá lugar no Consello Nacional do BNG deste sábado para celebrar unha asamblea nacional antes das municipais do próximo ano, como pide Encontro Irmandiño. Con todo, durante esta xuntanza houbo determinadas voces que mesmo apostaron por votar negativamente, tal e como fará a UPG. Un destes dirixentes foi Anxo Quintana quen salientou que o problema deriva do anuncio que fixo, logo das pasadas autonómicas, Carlos Aymerich comprometendose a celebrar un cónclave antes das municipais.