"Entendo que foi un acto distendido a unha festa que se me invitou e, por suposto, acepto totalmente e absolutamente as críticas que se fagan neste acto", dixo en resposta a a polémica causada pola súa intervención no peche dun acto solidario en Teo que GC desvelou xa o pasado martes.

O Concello de Boqueixón, gobernado polo PPdeG, foi un dos principais impulsores desta cea solidaria que tiña coma fin recadar fondos para as vítimas do terremoto de Haití. Feijóo acudiu a este acto en calidade de presidente do Goberno galego ao igual que o ex presidente da asociación cultural xuvenil Raíña Lupa e ex concelleiro en Boqueixón, Ovidio Rodeiro, que acudiu en calidade de director xeral de Xuventude.

Acto solidario

O acto tivo lugar o pasado 5 de marzo nun restaurante de Teo e a el acudiron máis de 800 mozos. Antes da cea interviu María Sande, unha moza galega que estivo de voluntaria en Haití tras o sismo. Tamén se proxectou un documental de Alejandro Ramírez. Ao evento tamén acudiu a actriz María Mera, á que logo se referiría Feijóo en varias partes do seu discurso como María Meira.

O presidente galego interviu ao finalizar a cea e, no seu discurso, non fixo ninguna alusión a Haití. Adicouse a criticar a socialistas e nacionalistas e a facer comentarios sobre María Méndez."Vou ser breve porque quedei con María Mera a partir da unha en ir tomar unha copa. De momento díxome que non, pero o vouno a intentar", dicía o líder conservador no seu discurso. "E de aquí ata que se organice a festa, eu vou seguir falando con María Mera para ver se teño algunha posibilidade", engadía.

"Machista"

Unhas declaracións que xa foron tildadas de "machistas" polos partidos da oposición e mesmo criticadas por algúns dos mozos participantes nesa cea como tamén se pode apreciar no video.

Logo do Consello da Xunta, e preguntado por esta cuestión, Feijóo dixo que "acepta" todas as críticas. "Non teño máis que engadir e aceptalas e nada máis. Entendo que foi un acto distendido a unha festa que se me invitou. Por suposto que acepto totalmente e absolutamente todas as críticas que se fagan neste acto e en todos, como non podía ser doutra forma". Así de contundente e de breve se despachou o presidente galego sobre esta cuestión.

***************
COMUNICADO DO CONCELLO DE BOQUEIXÓN DO PASADO 5 DE MARZO (vía santiagoycomarca)

NOITE SOLIDARIA CON HAITI.
 
Hoxe venres 5 de marzo vaise celebrar unha cena  solidaria para recadar fondos para as vítimas do terremoto de Haití.  Esta cena solidaria  vai a realizar no restaurante Los Robles, no Concello de Teo, e está organizada por un colectivo de organización de ámbito autonómico, que dende hai uns meses se puxeron en marcha para realizar esta actividade solidaria.

Antes da Cea os mais de 800 mozos e mozas que participarán neste acto solidario van a poder coñecer cal e a situación deste país caribeño da man de María Sande, unha moza galega, que participou como voluntaria nas actividades de primeiros auxilios realizada sobre o terreo  tralo sismo que o pasado mes de xaneiro asolou este país americano.
Xunto coa experiencia de María Sande proxectarase o documental “ Unha Aposta pola Vida”  dirixido por Alejandro Ramírez.

O acto dará comezo ás 22:00 h e nel participarán entre outras personalidades o Presidente da Xunta Alberto Núñez Feijoo e  o Director Xeral de Xuventude Ovidio Rodeiro.

Tódolos fondos recadados irán destinados a ONG CROSE, organización que  dende o momento do sismo está a traballar sobre o terreo coas vítimas e axudando a reconstrución do país.