Por Alberto Quián

A directora de Relacións Institucionais e da Área Legal de Microsoft Ibérica, Bárbara Olagaray, compareceu este martes 1 de xuño na Comisión de Presidencia, Xustiza e Interior da Asemblea de Madrid a petición do PP, PSOE e IU, que colaboraron co Defensor do Menor da Comunidade de Madrid, Arturo Canalda.

Os deputados madrileños e o Defensor do Menor responderon así ás denuncias do blogger Marcelino Madrigal e doutros internautas sobre estes contidos de pedófilos e pederastas. Microsoft é acusada de presunto deixamento e permisividade por non aplicar os filtros necesarios para bloquear estes contidos e non ter un sistema efectivo de detección e de denuncia, ademais de non dispor de controis para que non haxa menores de 13 anos na súa rede.

Estas denuncias, que se propagaron pola rede de microblogging Twitter, tamén se trasladaron a representantes da política galega. Polo menos o PSdeG foi informado en xaneiro pasado, a través de Twitter, dos contidos ilícitos en Windows Live, que foron á súa vez remitidos á dirección do PSOE en Madrid e ao Ministerio do Interior, segundo informaron a través da súa conta en Twitter. O PSdeG comprometeuse a “traballar no asunto”. Pero a día de hoxe este grave problema non chegou ao Parlamento español e tampouco foi levado ao Parlamento galego polo PPdeG, PSdeG e BNG. A Asemblea de Madrid foi a primeira en exercer presión política sobre Microsoft.