Constatemos que, por unha vez, o máximo líder do PPdG aceita que non é o grande xestor de eficacia asegurada que figura en case todas as biografías realmente existentes.Recoñece que non pode –e,ademais, non quere- promover un novo Estatuto e, simultaneamente, atacar o devalo económico.

Semellante posición política contén dúas proposicións implícitas que ofrecen suxerentes reflexións.A primeira: Alberto Núñez non lle outorga importancia política e/ou económica a un cambio estatutario que mellore a calidade do autogoberno.E a segunda:o presidente considera que está actuando coa máxima eficiencia no combate dos graves problemas económicos que padece a maioría da sociedade galega.

Se asumiramos a lóxica da argumentación presidencial teriamos que agardar seguramente unha década para elaborar o novo Estatuto.As predición dos analistas económicos mais serios non permiten manexar horizontes temporais mais próximos.Reparemos no paradoxo:o mesmo dirixente político que se atreveu a prometer que en 45 días de goberno ía deter o avance da doenza económica pídenos que teñamos mais paciencia que o famoso santo e practiquemos unha rigorosa e austera abstinencia estatutaria mentres non se recuperan os índices macroeconómicos e rematan cos malestares dos milleiros de universos microsociais.

Sorprendentemente, o presidente Feijoo tardou poucas horas en navegar polo pantano que supostamente quería evitar.Se Estatuto e crise eran realidades incompatíbeis, por qué lle dedicou minutos do seu precioso tempo a intentar demostrar a inutilidade do uso do termo nación no limiar do Estatuto ou por qué nos anunciou futuras entrevistas cos dirixentes do PSdG e do BNG, alterando a dedicación completa da súa “Superaxenda Anticrise”?

Para quen gustan de aplicar na política os criterios de selección de persoal que rexen en moitas empresas privadas, xa saben o que debe aparecer na vindeira “oferta laboral” para a presidencia da Xunta:buscase persoa con capacidade para resolver, ao mesmo tempo, un mínimo de dúas tarefas de complexidade manifesta.

Xesús Veiga