A vaga de lumes que está a soportar Galicia é a primeira gran crise coa bate o Goberno Feijóo. Unha lacra que sofre o país hai décadas. Con todo, de confirmarse o que apunta El País de que o Executivo mentiu sobre a morte dos brigadistas, pode converterse nun serio problema político para os conservadores.

“Con nós non morría xente”

A oposición leva días denunciando que o presidente está desaparecido e contrapón esta ausencia coa explotación política que fixo Feijóo das mortes nos incendios en 2007. "Con nós non morría xente nos incendios; co bipartito, catro personas" chegou a dicir.

“Podíamos citarvos cun vaqueiros de Armani, un zapatos náuticos e unha mangueira de xardinería” ironizou onte Carlos Aymerich (BNG) para lembrar outro dos episodios máis polémicos de Feijóo na oposición, cando convocou as cámaras para que o gravasen apagando unhas lapas.

Pola súa banda o PPdeG, a través de Rodríguez Miranda, indica que Feijóo está a coordinar a política contra os incendios, malia oficialmente seguir de vacacións. O presidente só compareceu unha vez ante os medios, despois dos falecementos, e non admitiu preguntas.

O Bloque asegura que non quere explotar as mortes de Fornelos, nas que puido haber descoordinación do dispositivo. Porén, varias colectivos próximos aos nacionalistas levan días alertando das eivas da política de prevención de incedios.

Falta de prevención no inverno

Os ecoloxistas de ADEGA xa criticaron que o PP eliminase o Voluntariado en Defensa do Monte Galego, lanzado polo bipartito tras a crise do 97. Hoxe a CIG arremete contra Medio Rural por privatizar a xestión da loita contra o lume á empresa Natutecnia.

O sindicato insiste en que “a Xunta non pode agora escudarse en que o sucedido en Fornelos de Montes foi simplemente un accidente laboral”. Ademais, os propietarios de montes en Mancomún denunciaron que as axudas para rozar os montes chegaron con atraso, ás veces mesmo este verán, cando o monte xa ardera.