"Esta páxina pretende ser un reflexo do que está acontecendo en Galicia, dado que a Xunta está mantendo unha política informativa totalmente obscurantista sobre os incendios forestais no noso pais". Así se presenta este grupo no Facebook do que forman parte destacados militantes socialistas, partidos políticos como a FPG e sindicatos como UGT ou Cc.OO.

"Arde Galicia" comezaba a súa actividade o 12 de agosto pasado, un día antes da desgraciada morte de dous brigadistas nun incendio de Fornelos do Monte. Desde entón, a este foro chegan diariamente dúcias de persoas informando sobre a aparición de novos lumes e aportando, ademais, fotos dos mesmos.

Contra a "desinformación"

Nas últimas horas son varios os usuarios que dan conta dos varios incendios da provincia de Ourense que afectan a Laza, Vilariño de Conso, o Barco ou Chandreixa de Queixa asi como outros que tiveron lugar en Oia. A maior parte do lectores queixase da "desinformación" da Xunta de Galicia e critica a política informativa dalgúns grandes medios de comunicación de Galicia.

Entre os usuarios desta páxina atopase a directora do Instituto de la Mujer, Laura Seara, quen nun post recente denuncia que "Galicia e especialmente Ourense arden con virulencia. Que dí ou fai a Xunta? Que vergoña máis grande". Tamén o alcalde de Noia, Rafael García Guerrero ou dirixentes socialistas como Eladio Osorio Montenegro ou Tamara Canosa forman parte deste grupo.