A plataforma SOS Sanidade Pública convoca unha manifestación o próximo domingo, 21 de novembro. Este colectivo argumenta que privatizar hospitais, como xa fixo o PP en Valencia e Madrid, resulta ao final máis caro para o peto dos cidadáns, que ademais reciben peor asistencia.

Ademais, a plataforma asegura que a calidade da atención xa empeorou de xeito importante dende que o PPdeG recuperou o poder. "Agora a xente espera case o dobre para operarse que cando o PP chegou ao Goberno", indican fontes desta organización.

A situación é especialmente grave na área sanitaria de Santiago, localidade que acollerá a manifestación.

"Santiago soporta o 88% do incremento das listas de espera en cirurxía de Galiza" indica SOS Sanidade Pública. Segundo os seus datos, en marzo de 2009 había 4.845 persoas á espera dunha intervención. En setembro de 2010 eran 5.990, 1.155 persoas máis.

Nenos agardando unha operación

O colapso no CHUS, o maior hospital da capital, é case dramática no eido da ciruxía pedriática.

SOS Sanidade pública apunta que o tempo de espera en marzo de 2009 era de 61 días con 233 cativos en espera.  "Nestes momentos hai nenos que esperan 136 días para operarse e nesa situación hai xa 335 nenos. Grazas ao PP agora a espera é máis do dobre que cando eles entraron no goberno”, asegura a plataforma crítica cos conservadores e  que conta co apoio do PSdeG, BNG, CIG, UXT e Comisións, entre outros. Está confirmado que polo menos doce alcaldes participarán na protesta.

37.808 pacientes agardan o primeiro diagnóstico no CHUS

As colas tamén son enormes para lograr un primeiro diagnóstico. "Nos CHUS agora hai 37.808 persoas esperando para unha primeira
consulta, é dicir están á espera de saber que lles pasa", indican os defensores da Sanidade 100% pública.

Nalgunhas especialidades, como uroloxía, a espera pasou de 73 días a 151,5.

Privatizar para solucionar o colapso?

O Complexo Hospitalario Universitario de Santiago atende a 418.965 habitantes. A area sanitaria complétase cos 63.721 que ten asignados o hospital do Barbanza.

Para superar o colapso actual, a Xunta vai construír dous centros de saúde dentro o paquete de dezanove anunciado para todo o país.

Iso si, os centros  Galeras e Conxo faranse mediante colaboración “público-privada”, unha fórmula que, como xa explicou GC avaliando o resultado desta política en Madrid, permite ás construtoras asegurarse os beneficios mentres se reduce o cadro de persoal e, polo tanto, a calidade da atención.