O ex conselleiro e deputado Ricardo Varela pediu hoxe o "cese inmediato" da director de informativos da TVG, Pilar Bermúdez, por exercer como interventora do Partido popular nas últimas eleccións autonómicas na localidade de Bertamiráns, en Ames (A Coruña).

Bermudez non é a única, xa que o director do Telexornal Noite tamén exerceu como interventor do PP tamén en Bertamiráns, aínda que este anunciou que dimitiría.  "Calquera é libre de facer coa súa vida política o que desexe, o que non pode baixo ningún concepto é facer carreira política dentro dun medio público como a TVG”, sinalou ao suliñar que esta situación pon de manifesto o "control político" que o PP exerce da TVG.

"Correspondelle" a Sánchez Izquierdo

E foi o presidente galego, Alberto Núñez Feijóo, quen tivo que saír ao paso destas acusacións na rolda de prensa posterior ao Consello, pero sen emitir ningunha opinión ao respecto. "Iso correspondelle valorar ao presidente da compañía", dixo en alusión a Alfonso Sánchez Izquierdo, moi cuestionado dentro da CRTVG por seguidores do ex director da Radio Arturo Maneiro.

Sen embargo, a Feijóo tampouco se lle escapou que outro presentador dun programa da Radio Galega, en alusión a Xusto López Carril, tamén foi xefe de prensa do PSdeG durante o bipartito. "O director da CRTVG ten liberdade e independencia para distribuir as funcións como crea oportuno e con criterios profesionais sen mirar se a directiva foi interventora dun partido ou un presentador desa mesma casa foi xefe de prensa dun partido, porque como profesionais teñen que cumprir o seu traballo", engadiu.

Un xornalista nas listas do PP de Lugo

Por outra banda, o director de informativos de Radio Lugo-Cadena Ser, Arcadio Silvosa, foi "fichado" polo PP de Lugo para ir en postos de saída, como número cinco, nas listas deste partido na capital lucense. Unha decisión que provocou sopresa entre os profesionais de comunicación da provincia xa que Silvosa traballa nun medio afin ao PSOE e, tradicionalmente, moi combativo coas teses do Partido Popular.