Monólogo do remordemento

Sempre hai momentos baixos nos que un exercicio de conciencia saca á superficie a dura realidade.

Por Rodri Suarez | A Coruña | 07/02/2012

  • versión para imprimir
Tiña mal día. Demasiadas preguntas na cabeza. Dilemas éticos que non o deixaban parar quieto. Como se lle ocorreu usar ser libre para opinar nunha crónica de opinión publicada nunha sección de opinión e achegando unha opinión distinta á maioría das outras opinións opinadas? Como se lle ocorreu disentir con educación das actitudes dunha persoa logo de ensalzar a súa figura? Como se lle ocorreu destacar as virtudes de outros para intentar ofrecer información pouco difundida sobre as razóns da súa vitoria? Como se lle ocorreu meter a gamba, como mínimo, nun punto e que por ese case ninguén protestase? Como se lle ocorreu defender vellas ideoloxías alternativas cando este sistema que temos vai como un tiro? Como se lle ocorreu criticar a liberdade de insulto en internet? Eran demasiadas preguntas. Non aturaba o desacougo e marchou tomar unha copa. Sentou na barra dun irlandés. Alí bebería uns cantos whiskeys mentres escoitaba aos Pogues. Caeron os dous primeiros cubatas (evitou chamarlles cubalibres para non dar pé a máis historias). A imaxe era tirando a decadente. Pero para mal rollo, o do tipo con chaqueta de pana que sentaba ao seu carón. Ese xa tomara máis de dúas e non paraba de rosmar en baixiño. Como sempre ocorre nestes casos, ambos acabaron conversando. Os baixóns atráense. O da chaqueta de pana contou unha historia. Esta é a súa transcrición resumida e traducida do castelán: 
 
“Pois si tío, ti andarás raiado con eses contos pero son anécdotas de adolescente, o meu si é de traca. A maioría da miña vida foi unha farsa, a maior fraude política xamais construída. E sei que por moito que agora ande con remordementos afogados en gin-tonic, mañá volverei ao choio, ao engano masivo. Esa é a miña historia dos últimos corenta anos, a dunha maquillaxe, a de ser eu a maior barreira ao desenvolvemento de auténticos ideais de esquerda. Nada que ver co que era cando nacín. Por certo, xa que ti es de aquí, meu pai era de Ferrol, aínda que tampouco exerceu demasiado de galego porque emigrou moi novo. Pero era un revolucionario, moderado pero obreiro, a saber o que diría se puidese ver o que fixen co seu legado.... Logo nos anos trinta comecei a ter dúas almas, pero non se me podía negar a aposta de esquerdas e republicana preparada, polo menos en parte, a combater aos burgueses, os mercados daqueles tempos, que andaban ao mesmo que os fascistas. Iso si, tamén era centralista... anda que non lle din 'largas' ao voso aquel... o que debuxaba.... si, Castelao, pois sumeime ás trabas á Autonomía que el trouxo aprobada, creo que logo o contou nun libro que aquí tivo moito éxito. Pero antes, no 34, ao ver que a dereita quería montar un golpe como o de Mussolini pois fun dos que collín as armas, pero nos derrotaron. ¡Carallo, o que eu era...! Porén, dentro de min xa notaba esa alma que estaba a outra cousa. Logo chegaron os falanxistas e os nazis, montaron unha guerra e acabaron comigo e con todo, loitei o que puiden, pero nada.... hostia, cada vez que penso que en Euskadi cando o PNV se rendeu quedamos loitando contra os fachas só eu, os anarquistas e ANV e que hai pouco tiven os putos collóns de ilegalizar a ANV.... en que me convertín? Xa, si, o cambio de chaqueta foi nos setenta. Durante a ditadura andei máis ben calado. Sen marchar de todo pero sen liderar nada. Ata que empecei coa parvada. A venderme. Merda... Tomamos outra? Eu Gin-tonic, hai tempo que non bebo outra cousa que iso, con hortalizas e tal, como os poñen nos sitios pijos nos que paro. Está ben o garito este. E a música mola. Eu son moito de Sabina, ese é outra, un xenio innegable, pero vai de maldito contra todo e logo móntalles ceas aos príncipes na súa casa... que cousas. Onde estabamos? Ah, nos setenta. Bueno, bueno, bueno, o de Suresnes... tiven os santos 'huevos' de dicir que de Marx xa nada, por favor... que eu nunca fun comunista pero se me quitas a Marx, con todos os seu erros, en que quedo? Pois no que quedei, na xestión do poder polo poder. Xa o sabía daquela. Foi cando me puxen cara de líder sevillano porque iso era o que me mandaron. Quen? Joder, os alemáns. Agora ando dicindo que moi mal que nos gobernen os alemáns, con todo o morro ¡pero se a min quen realmente me levou a carreira foron os alemáns socialdemócratas! E quen estaba detrás deles? Pois os ianquis, claro. Eles deseñaron, e me soltaron unha burrada de pasta, o plan polo que tarde o temprano eu sería como os demócratas en Estados Unidos, unha trampa con fondo e algunha actuación progre cuxo real sentido era gobernar en quendas e entón darlle algo, non moito, de benestar á xente, e así adormecer á clase traballadora, que seguiría estando abaixo. Buf, igual divago, ou igual non, igual nunca fun tan sincero. E xa acabei a copa. Outra. E outra para ti, que tampouco vas a mal ritmo. Bueno, pois con ese plan da elite occidental, para o cal foi decisivo poñer a pasta riba da mesa e acabar con outros partidos socialistas, como o PSP ou debilitar ao PSG e semellantes, como era lóxico acabei chegando ao Goberno. Antes xa me vendín á monarquía, traizoando a miña historia republicana, e xa non foi que o aceptara naquelas circunstancias, senón que me convertín para sempre no principal pelota de todos estes tipos, do Rei e os Urdangarines da vida. Moi de esquerdas, si. Que tempos tan tristes aqueles doutra farsa, esa que chamaron Transición, que renuncia... foi cando comecei a gozar dos sumidoiros da política, eu tamén estaba naquelas historias subterráneas do goberno de unidade contra Suárez que acabou dándolle forma descarriada ao 23-F, pero non se soubo e aos poucos meses votáronme dez millóns de persoas e xa tiña o ansiado poder, a partir de aí, máis timo, imaxe de esquerda e labia de ouro, pero no fondo capitalismo social-liberal ás ordes dos mercados europeos, que á súa vez estaban ás ordes de Estados Unidos e os ultras da escola de Chicago. ¡Que fotos me sacaba eu aos pés de Reagan e Tatcher! E o da OTAN? Que forte. Toda a vida con discurso antiimperialista e tal, e así como toquei moqueta e como xa tiña falado cos xefes dende hai tempo, veña OTAN, veña invasións e marines, veña a coleguear co capitalismo salvaxe. Ou non foi unha salvaxada a reconversión industrial que fixen inmediatamente? Milleiros de obreiros á rúa, miseria en zonas enteiras, aquí Ferrol e Vigo desfeitos, marxinalidade nos barrios populares, heroína... Para compensar mellorei algo os servizos sociais, pero sempre deixándoos moi lonxe do máis elemental nivel europeo. E a que montei no País Vasco? Joder... grupos terroristas pagados con impostos, galindos, logo máis adiante ilegalicei ideas, nunca loitei contra esa tortura que todos os anos denuncia Amnistía Internacional, dispersión... tremendo. Aquilo da autodeterminación que defendía nos meus tempos? Nada de nada. De feito entregueime á represión incluso dos mellores, como aqueles insubmisos que se negaban a aceptar o secuestro da mili e aos que mandei á cadea a centos. E xa na recta final desa etapa inventei unha cousa chamada 'cultura do pelotazo', logo cando chegaron os outros empeoraron todo moito máis, certo, pero os desfases financeiros e a especulación xa existía nos meus tempos sevillanos, que acabaron porque cando só vives para o poder, sen ningún tipo de ideoloxía, pois é fácil darse á corrupción, e diso tiven de sobra. En fin... veña, dille aí que poña as penúltimas que vou lanzado. Do mesmo, si. Por certo, antes estiven tomando uns albariños e tamén lembrei a miña patraña aquí en Galicia durante moito tempo. O andaluz que eu era daquela non quería ter cerca a Fraga e pactamos deixalo gobernar aquí para que non molestara en Madrid, que é o que me importa. Na campaña do 89, o sevillano nin apareceu por estes lares a darlle un pulo ao candidato galego, despois non protestei por unha saca de votos sospeitosa... polo contrario, un dos meus foi o que realmente fixo tándem con Fraga para mandar nesta rexión [refírese a Galiza], si, o que era alcalde da Coruña, cada un tiña o seu reino e non se molestaban un ao outro, ao revés, colaboraban. A oposición era teatro, e frouxo. Non me andei con prexuízos á hora de conspirar para ter poder e 'ladrillear', por iso en días como hoxe síntome noxento. Logo de todo aquilo, tras algún desastre electoral, chegou un rapaz novo de León e como cando estou na oposición pois vou de superesquerdista acabei volvendo a gobernar, grazas a erros dos outros e tamén a aquilo de 'Non á Guerra'. Non á Guerra.... ¡Pero si estiven ata hai tres días masacrando Afganistán xunto ao Obama, outro que tal! Pantomina todo. Agora andamos protestando polos recortes... pero é que ninguén lembra que eu xa os fixen nos anos noventa? Vale, é certo que con este de León como presidente tiven ao principio o meu mellor tempo con algunha lei social necesaria, seguramente porque pactaba coa esquerda. Tamén asinei cousas chulas para Galicia pero logo nin caso. Todo esa xeira que tanto ilusionou a algúns apenas durou. Porque a min o poder sempre me cega. Mira como lles fixen o paripé aos cataláns co de que sexan nación e logo tamén mirei para outro lado e deixei correr aquilo do estado plurinacional. Tamén había que ser inxenuo para crerme, a min, que teño a Bono en primeira liña. Por suposto, a especulación urbanística e financeira nin a toquei. Logo chegou isto da crise, que a xente que é de esquerda de verdade xa tiña anunciada dende hai tempo, e eu pois ao meu, ao que me digan os poderosos, a atacar ás clases populares. E dálle paro, e dálle precariedade... e aínda fun tan desvergoñado que para mirar solucións chamei á Moncloa aos banqueiros e compañía, os culpables do asunto. Agora a xente vota masivamente á dereita orixinal. Lóxico. A demostración diáfana de que non son nada do que digo ser é que tiven un cuarto de século de poder e non fixen nin un só esforzo para que a xente rexeitase a cultura capitalista que se foi impoñendo, por iso agora a sociedade é máis de dereitas, porque pasamos como da merda de ofrecer un discurso e uns valores distintos aos dos mercaderes. Así son eu, unha trola. E niso sigo, con baixón e remordementos alcohólicos como o de hoxe, pero iso non limpa a conciencia nin os feitos, porque non vou cambiar, acaso non ves que agora me visto de Rubalcaba? Todos aí, coidando do postiño que teñen... E acabei o meu congreso coreando a Internacional puño en alto, ha, ha, ha, ha... pero a xente non se decata? Que farsa... 'En pé famélica lexión' cantei con toda a cara do mundo. Ou collo e solto que vou facer todo o que non fixen, e ala, tragan e seguen escribindo que somos “de esquerda”. Eu, que como moito son centro prosistémico. Se ata hai quen cando se refire á “esquerda” só fala de min, por favor... Esa tamén é outra. Cando me sinto chungo como agora dáme mal rollo sobre todo por esas moitas persoas das bases ou votantes que realmente si teñen boas intencións e si son de esquerdas, pero entre a axuda que me dan os medios de comunicación e o meu poder pois seguen caendo na trampa. Buff.. non sei se tomar outra... non, mellor paso. Vou durmir que mañá teño que continuar co timo. Ti segues de marcha non? Bueno, pois nada, lisco. A todo isto non nos presentamos, tampouco fixo falta, xa imaxinarías quen son. Chámome PSOE”. 

Rodri Suarez




Comenta

Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións). Agradecemos a túa colaboración.

¿Que caracteres alfanuméricos hai na imaxe? descarta espazos e signos

Exemplo: para C*8 Km@ introducir c8km.

captcha

¡Non entendo o texto!: cambiar imaxe






¿Que caracteres alfanuméricos hai na imaxe? descarta espazos e signos

Exemplo: para C*8 Km@ introducir c8km.

captcha

¡Non entendo o texto!: cambiar imaxe


Comentarios

37 comentarios
9

aaaaaaaaaag

Cuns cantos pontos e aparte soltos por ahí, mesmo o leía.

1 resposta
1

Por Lector: Parece claro que o fai aposta. Avísote logho que non leas 'Periferia' de Iolanda Zuñiga, que gañou o Xerais sen un ponto e aparte en 500 páxinas.


8

non de traca

*de outros non, doutros *meter a gamba non, meter a zoca * fai non, hai anos ou vai anos (esta última vese en moitos comentarios), etc. Hai que procurar escribir ben ese galego.


7

Hamlet

Espero que ao articulista lle pasara xa a resaca, cousa que ao seu contertulio, de seguro, lle durará algo máis.... Unha cousa lle preguntaria ao da chaqueta de pana e despois liño enrugado (Beautiful People Look): se é certo o que me contaron que, nun debate electoral entre Fraga e Sanchez Presedo, aquel amosara unha carta de “agradecemento e apoio” do daquela alcalde de La Curuña..... Porque este sí foi listo, abofé... mentras no Ferrol e Vigo sofrían a reconversión naval, Francisco Vazquez inzaba a cidade de obras e fastos a conta dos Orzamentos do Estado..... O psoe, coma o pp, actuaron dende o 77 cuspidiño a como o están a facer na actualidade, centralismo e unitarismo un, municipalismo e localismo outro, ambolosdous, na máis pura esencia do nacionalismo español do XIX, todo con tal de ocultar a unidade e identidade do pais. As persoas e escearios poden mudar, porén os comportamentos e actitudes permanecen.

3 respostas
1

Por Hamlet: Por suposto que recoñezo a integridade e valía dalgún dos seus militantes, D. Issac Diaz Pardo, exemplo para todos, o compromiso de Caamaño ou Francisco Cerviño en momentos difíciles e actuando á contra. Ou no pp.....no pp?...hai alguén aí???

2

Por entreoscarballos: Eu non entendo como alguén que se considera galeguista pode militar non partido españolista, centralista e tendo de compañeiros militantes a xente como o fascista paco vazquez ou o mafioso populista abel caballero. De igual maneira non podo entender que Cuiña milite no PP, baixo o pretexo de que a esencia do partido é galeguista... Incoherencia

3

Por xan soares: Hamlet, conocordo coa túa análise ao 100%. Aperta.


6

ademarcisnegro

A Socialdemocracia NUNCA rexeitou a cultura capitalista, porque nas súas teses fundacionais percibiuse que o nivel de vida dos traballadores melloraba co sistema capitalista, cunha lexislación de control, sindicatos e políticas sociais. De feito, moitos traballadores de “colo azul” hoxe en día consideránse a se mesmos de clase media. É evidente que a globalización, o permitir a libre circulación de persoas e capitais, ataca diretamente ás políticas de protección soberanas, e por iso a Socialdemocracia está en crise, que terá que resolver... Porén, a Socialdemocracia non é a Esquerda, que é outra cousa. Se o Capitalismo puro é o campión en crear desigualdades sociais, a Esquerda é a mellor igualando a pobreza por abaixo. (continúa)

7 respostas
1

Por ademarcisnegro: (continuación) Gustaríame saber como sería o discurso na barra do bar do tipo chamado BNG, tras un curto e contradictorio periplo no poder, ou indo mais lonxe, sería interesante escoitar os de PCC - Partido Comunista Chino- , o do seu tocallo PCC -Partido Comunista Cubano- e iso por non dicir os do PTC -Partido dos Traballadores de Corea- ou o do Jemer Vermello...Estou desexando que te topes con eles no irlandés e nolo contes. Dito o cal, coincido contigo en moitas das tremendas inconsistencias en que caeou o PSOE nos 133 anos que leva de vida. Como non podía ser doutra forma, desgraciadamente.

2

Por antidoping: Vexo en ti nonseiquéneghro un bó dummie da propaganda fetichista do capitalismo imperialista, contanolo ti, contanola tua esperiencia porque a dos que te narcotizan xa a coñecemos, iluminado, xa que eres tan listo.

3

Por Larchán: NUNCA, non é certo, non todo é branco ou mouro, de feito a socialdemocracia nos seus principios rexeitaba a cultura capitalista, na que só via o seu desenrolo no capitalismo como alto temporal. A socialdemocracia era unha vía o socialismo por métodos pacificos, parlamentarios. De feito formou parte da Internacional Socialista deica que foi expulsada pola sua deriva. É o que pasa cando renegas dos teus principios ou fins, que perdes a tua esencia.

4

Por ademarcisnegro: Certo Larchán, excedinme no de NUNCA, se tomamos o historicismo o pé da letra. É certo que nos comezos foi tal como dis. Puntualizo entón e fago a seguinte matización: troco o de "A Socialdemocracia NUNCA...." por un mais claro "A Socialdemocracia, tal e como a entendemos agora e desde hai bastantes anos, non rexeita a cultura capitalista...". Grazas por corrxirme. Antidoping, ahí tes a experiencia contrastada neses países. Podes documentarte en mil sitios e alí cho contarán mellor do que eu o poida facer. Pero non porque fora desastrosa, iso significa que o capitalismo é bo. Son argumentos distintos. As críticas ao capitalismo darían para varios posts. So comento que a experiencia doutros tipos do bar, con anos no poder e neste caso desde a esquerda, tamén dan para varios gin tonics. E os teus insultos, por favor gardaos para non desacreditarte soíño. Veña, que ti podes!

5

Por Artus: Onde eu me documento non me transmiten o mesmo que ti, será porque nonos documentamos nos mesmos sitios, polo cal mentras nono comproves por ti mesmo, é millor que fales do que coñezas e non facer analises tan simplistas que eluden condicionantes. Porque en Cuba ó igoal que en Corea están en guerra, guerra declarada polo imperialismo ianqui unilateralmente, que fai que calqueira cibdadan ianqui que viaxe ou comercialice con eses países poda ser condeado a dez anos de cadea e multa de deica 1.000.000$, por por só un exemplo.

6

Por ademarcisnegro: Opino que os seus documentos son moi sesgados. Todos o son, pero como dicía Orwell, uns mais ca outros. Eu persoalmente tiven a oportunidade de percorrer Camboxa e (unha parte de) China, non so nas cidades, senon tamén no interior...e qué quere que lle diga? Camboxa non levanta cabeza dende que hai trinta anos a Pol Pot se lle dera por baixarse a dous millóns de compatriotas que eran sospeitosos de non querer colaborar coa construcción dun estado agrario maoísta. A pobreza por doquier, o medo nos recordos da xente, os mutilados por minas antipersoais e unha visita aos "killing fields" ou a Tuol Sleng, abrenlle a un ben os ollos. A incosistencia do "comunismo" chino nótase nada máis chegar e a violacións de dereitos humáns están reflectidas nos mesmos documentos que vostede le. O de Corea será, me temo e desgraciadamente, parecido ao de Camboxa cando caiga o reximen.

7

Por ademarcisnegro: O caso de Cuba é distinto. É certo. Non podemos metelo no mesmo peto que China, a Camboxa khemer ou Corea do Norte, lóxicamente. Non estiven en Cuba, logo so podo opinar dela polo que vexo/lexo. Tenme certo romanticismo "la revolusión", pero tamén é verdade que hai cousas comas estas: http://bit.ly/wQ59jd que fanme pensar que mais que revolución está a ser unha roubolución, o roubo de moitos dereitos. Preocupame a súa transición democrática e estou totalmente en contra do bloqueo norteamericano, coma non pode ser doutra maneira. Outras ligazón de interese:(1) http://bit.ly/y9LWaz (2) http://bit.ly/zOjleq (3) http://bit.ly/wnYjfr


5

Bruno V

Bom artigo, como de costume Sr. Rodri. A historia do psoe suponho que será similar a de muitos partidos "socialistas" ou social-democratas europeos dos 60-70 para aqui. Umha historia dumha deriva calculada e maquilhada polos dous sindicatos do capital.

8 respostas
1

Por marco: A historia do PSOE é moi semellante a do BNG, o que acontece é que esta última ao Sr. Rodri non lle pagan por contala e a ti seguro que non che pasou pola cabeza solicitala. Farsantes, moitos vendidos na falsa esquerda e no nacionalismo light que nunca ataca a unidade da patria maior. Seguide xogando á política alternativa de cara á galería!

2

Por Asqueado: Desgraciadamente, como a moitos xornalistas neste país, o que ti chamas Sr. Rodri non lle pagan por facer estes artigos, como ocorre con todos os columnistas do Galicia Confidencial, que aínda por riba de ofrecerse gratis a facer artigos dende un punto de vista distinto aos da voz-faro-correo ten que aguantarvos a tipos como este últimos dicindo que son pagados de non se sabe quen e tal. Qué asco.

3

Por marco: Non tan Asqueado... Que no lle pague GC non quere dicer que non lle paguen outros, pois como xa saberás o Sr. Rodri -repetindo o do Bruno que me precede- cobrou do BNG. Se non o sabías es pouco ilustrado, mais se tratas de tapar o que moitos coñecemos es simplemente tramposo. Mellor que asqueado semellas ben mantido!

4

Por Asqueado: Eu vexo que cobrou de Jacinto Rey, La Opinión, Prisa e os medios pùblicos. Pero claro, entón non cobraba dos empresarios do ladrillo, dos magnates dos medios mentirosos ou do PP que domina a TVG, estes dan igual, o único problema é o BNG. Pos nada, que aproveite.

5

Por Marconi: Supoño que marco quererá dicir que traballou no BNg e como é normal cobrou por facelo,como nos periódicos outros nos que traballou e como centos de persoas no BNG nos últimos 30 anos, malia que ao principio deixe caer que realmente cobra agora e cobrou antes por facer artigos a prol do BNG no GC, algo falso. Grazas a Suárez por facer artigos valentes como iste. Por certo, mira como de algúns que traballaron no BNG e moito máis tempo non dicides nada, claro como xa teñen os seus xornais para promover outras forzas políticas pois eses son o máximo, só se pode opinar se é contra o BNG, se é a favor pois os que acusan de sectarios xa sacan a víscera contra o que o fai.

6

Por marco: Mira como o Marconi vai entendendo... Ti podes ver que dixemos que está cobrando polos artigos en GC, para outros "cobrou" é pasado. E cobrou do BNG, certo. E se cadra está esperando a oportunidade para recuncar, e mesmo fai méritos. Polo demais a vosa liberdade para opinar ten fronteiras e data de caducidade, eu non a merco. Obrigado.

7

Por Marconi: Os méritos do articulista para "recuncar" como dis ti será os do seu currículum, que é público na páxina e seguramente é mellor que a da maioría dos que vides aquí a metervos con quen non di o que queredes oir. E sei cando un verbo é pasado, pero escribiches ao principio "ao o Sr. Rodri non lle pagan por contala", nun claro presente manipulador. E como non sei de que me falas, só digo que a miña liberdade para opinar nin ten fronteiras nin data de caducidade. E xa está que hai un montón de cousas para facer máis importantes.

8

Por censor en excedencia: Marconi non te poñas cachondo, se o Rodrigo Suarez conta o que sabe do Bloque non recunca, iso é o que che tratan de explicar. Polo demais es ti o que dixeches que "só se pode opinar en contra", non a favor, segues co de "o que queredes oir", es ti quen pretendes guiarnos sobre o que se pode opinar con criterios tan subxectivos como tratar de valorar o historial de comentaristas que de nada coñeces. Pois iso, non lle temas tanto aos que opinan diferente do que manda o teu catecismo.


4

Antón

Crónica dunha traizón, totalmente verdade incluso a implicación real no 23F agora ratificado polos arquivos desclasificados alemans e o home da CIA, Isidoro, imposto en Suresmes e logo posto en liberdade polas autoridades franquistas con bronca incluida o despistado inspector sevillano que o detivo o seu regreso.


3

anton

Por certo. Sei de boa tinta que algún iluminado da UMG, que non ten moito que facer nesta fase post-asamblear, como lles soe pasar normalmente os cachorros de Paco, adicouse a montar un video para mofarse de Severino, alcalde de Monforte polo seu erro (polo que pediu públicas disculpas). Este é o talante e os espíritu de integración da UPG. Siguen nas trincheiras e a disparar a discrección os compañeiros, como no seu día fixeron con Quintana. INDIGNANTE

6 respostas
1

Por Que si: Era raro, un co monotema e ademais aproveita para defender o "erro" e as "desculpas" consistentes en dicir que xa non ten volta atrás. E do PSOE nin palabra, claro. O problema do universo é o Bloque e a UPG.

2

Por anton: Porque non fan o video do PSOE en vez de facelo dun compañeiro? Pero a ti pareche normal? Eu non defendo o erro. De feito digoche que é un gran erro e unha vergonza. Estou esperando que Ansede por exemplo pida perdón polo caso de corrupción CARRUMEIRO, en vez de estar escondido e escribir epístolas no Terra e Tempo, e non, non o fará porque a UPG nunca se equivoca, nin pide perdón. O ego do partido líder e omnipresente que nos teledirixe a todos. Como estou dacordo co do PSOE espero que non se volva pactar con eles, e menos con pactos tan lamentables como os de Coruña, Lugo ou Vigo.

3

Por lemés: Antón, con certeza de que o acontecido en Monforte é unha vergoña. Pero o erro foi ratificado pola asemblea comarcal, onde son/sodes maioría os de +Galicia e Irmandiños, negándose a valorar a posibilidade de corrixir o acordado. E por riba aparece a Vega en El Progreso dicindo que ao BNG tamén lle vota xente do PP, por iso non se opoñen a honrar a Fraga. Sabemos que foi premeditada a postura do BNG no concello, non se quixo rectificar e aínda se xustifican. O de vergoña quedou curto para calificar semellante desatino.

4

Por lemés: O de Carrumeiro Media é outra ferida que supura... Certo, pero podías preguntar en Monforte por Rural Consulting, pola familia Quintana de Allariz, polos concursos públicos que non se celebran e polas adxudicacións a dedo. E despois falamos de novo da Vega que xustifica a rúa que honra a Fraga, a señora que tiña un irmán -o Veiga- que asesoraba ao tamén irmán da titular da consultora de apelido Quintana... E despois falamos dos do MC e logo Inzar que entraron no BNG, e da limpeza do sangue que tampouco ten a UPG. Ou tapamos a cara da vergoña allea?

5

Por Lucio: A recurrente enganchada dos dous polos bloqueiros, pero qué cansinos sodes! non tedes casa?

6

Por Que si home: Que "caso" de corrupción? Pero de verdade que o único que tedes para insultar ao Bloque son calumnias e medias verdades? Ide "abrirvos á sociedade", que seguro que atopadesm moitos compañeiros de viaxe dispostos a aturarvos!


2

anton

Victimismo o xusto. O mesmo que opinas ti, opinamos os demais dos teus escritos públicos. Comprenderás e supoño que te imaxinabas que un discurso tan forofo hacia as cores da Unión do Pobo Galego 2 días despois dunha Asemblea Nacional, que se caracterizou pola dialéctica agrevisa, polo insulto e faltas de respeto a compañeiros non camaradas, nomeadamente Beiras e alcaldes do BNG que non son da UPG, levaría as críticas e debates que neste medio se teñen producido. Supoño que che parecerá o lóxico. Ese PSOE do que falas é, por certo, ese partido co que o BNG pactou por decreto dende fai mais de 10 anos o que o levou perante a cidadanía galega a parecer partidos asimilables.

3 respostas
1

Por Carreiro: Supoño que ao principio se queixará dos insultos e todo ido, non da xente que debateu con normalidade, ata acaba o monólogo do principio falando dos que insultan, non de todo o mundo. Logo, o do PSOE paréceme xenial.

2

Por Boa viaxe: Contestarvos nunha asemblea é "insultarvos". Cando vós insultades na prensa é "lexítima discrepancia". Bendita sexa a xente que se meta con vós no voso novo partido, ten o ceo gañado!

3

Por Xanti: Non oh, dicir como escoitei por aí "a tripulación xa está preparada, agora que marchen as ratas do barco", iso é contestar educadamente...


1

toupa

o monólogo do remordemento introducido polo da autocomplacencia


Rodrigo Suarez

Rodri Suárez (A Coruña. 1974) é xornalista. Foi xefe da área de Política de Xornal de Galicia e xefe de Deportes en La Opinión de A Coruña, traballou en A Nosa Terra e DxT Campeón, foi guionista de humor para a TVG e colaborou ou colabora en varios medios, como en Localia Coruña (Turkia, La Prórroga) en Radio Coruña-Cadena Ser (A Tropa da Tralla ou a programación deportiva), Cope-Galicia ou as revistas Bravú e Interviú, que postas así compoñen un sorprendente pareado. Como o seu eixe vital anda entre Monte Alto e Fisterra ten o soño de ser fareiro.

Galicia Confidencial 2013 | Contacto | RSS | Legal | O Proxecto | Sustentabilidade | Preguntas | Achegas | Publicidade | Autopromo | BLOG | Co apoio técnico de dinahosting

CC