O carro é un símbolo neste país, non só como metáfora material da sociedade labrega tradicional, como gostaba de reseñar o etnógrafo Xaquín Lorenzo. Tamén foi o signo icónico-visual da represión feixista, como aquel librepensador compostelán, O’Nécoras, abatido na Ponte da Rocha e exposto en Compostela polos falanxistas, ou o guerrilleiro Curuxás retratado coma un marrao sobre un carro, na matanza. O carro tamén foi empregado no “gran desmoche” da ciencia galega por parte do totalitarismo nacionalcatólico. De feito, foi un Carro, o crego Xesús Carro García quen se preocupou trala guerra polas migallas do Seminario de Estudos Galegos.