Por Erik Dobaño | Santiago de Compostela | 24/07/2019 | Actualizada ás 13:20
Axentes da Policía Nacional levaron a cabo unha operación por unha fraude á Seguridade Social que supera os nove millóns de euros a partir dunha armazón empresarial que se estendía por 17 provincias: Alacante, Almería, Barcelona, Cáceres, Cádiz, Castelló, Xirona, Huesca, A Coruña, León, Lugo, Madrid, Sevilla, Toledo, Valencia, Valladolid e Zamora.
As investigacións, en colaboración coa Tesouraría Xeral da Seguridade Social, comezaron a finais de 2018. Hai 45 persoas investigadas, das que 28 foron detidas nas citadas provincias tras recibir varias denuncias que informaban de ilícitos penais que se estaban cometendo contra a Tesouraría Xeral da Seguridade Social.
Segundo informou a Policía Nacional, os investigados crearon armazóns empresariais con empresas debedoras e empresas pantalla ás que se lles repercutían os beneficios e o patrimonio co fin de eludir o pago á Seguridade Social.
Os 45 responsables do delito resultaron ser, principalmente, os administradores de feito das empresas, pero tamén os seus homes de palla --algúns deles traballadores que figuraban en conivencia--, así como familiares dos primeiros, a quen se lles imputou delitos contra a Seguridade Social (fraude de cotizacións), frustración á execución, fraude á Seguridade Social (fraude de prestacións), falsidade documental, insolvencia punible e usurpación de estado civil.
Avanzadas as investigacións, realizáronse informes patrimoniais das persoas implicadas, co fin de que poida solicitarse o embargo daqueles bens localizados.
FALTA DE PAGAMENTOS E SEN VACACIÓNS
Desde que no ano 2009 comezasen as actividades dunha das empresas investigadas, xamais foron ingresadas as cotizacións dos seus traballadores, xerando ata a data un prexuízo á Seguridade Social de 376.884,01 euros. Por este feito, a administradora da sociedade foi detida como autora dun delito agravado contra a Seguridade Social.
A falta de vontade de regularizar a situación coa Seguridade Social foi palpable durante estes anos, ocultando á Tesouraría Xeral da Seguridade Social a verdadeira situación laboral da sociedade e o seu balance económico. Aos traballadores pagábaselles o seu xornal en metálico, non se lles daba de alta na Seguridade Social nin se lles facía contratos onde se especificasen as horas a traballar nin o salario que recibir polo seu desempeño profesional.
Aos empregados, a pesar de traballar todas as semanas de luns a sábado e nalgúns casos desde o ano 2013 ata a actualidade, non se lles abonaba o salario se se puñan enfermos ou se ían de vacacións.
ADMINISTRADOR EN PARO CON 700.000 EUROS
Unha empresa administrada concursalmente tentou ser comprada fraudulentamente por unha segunda sociedade, segundo destacou a Policía, coa que supostamente se resolverían os problemas económicos vixentes coa Seguridade Social, valorados en máis de 150.000 euros.
Para reforzar a oferta sobre a unidade de produción, a adquirente valeuse dun documento asinado polo administrador dunha terceira sociedade, que comunicaba a aprobación dun financiamento para esta operación por un importe de 700.000 euros.
Esta última empresa, que foi comprada por un euro e que non figura dada de alta na Seguridade Social ao carecer de traballadores, ten o seu obxecto social moi afastado da principal investigada. O seu administrador, no momento de firma do escrito de financiamento, cobraba un subsidio por desemprego, o cal indica que esta mercantil non tiña capacidade de realizar unha operación desas características.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.