PPdeG e PSdeG pactan o nomeamento da nova valedora, que anuncia unha nova época "feminista" nesta institución
A maxistrada Fernández Galiño reivindica a súa "independencia", mentres que o resto de grupos critican a "falta" de consenso na súa elección.
Por Europa Press / Redacción | Compostela | 29/07/2019 | Actualizada ás 14:10
A maxistrada María Dolores Fernández Galiño foi designada de maneira oficial como candidata a ser elixida valedora do Pobo no pleno extraordinario do Parlamento de Galicia que se celebrará o vindeiro mércores. Durante a súa comparecencia este luns na comisión de peticións da Cámara, reivindicou que os seus "coñecementos técnico-xurídicos" e a súa "independencia" constitúen o seu "capital persoal" para o cargo.
Orixinaria do Carballiño (Ourense), Fernández Galiño interveu no Lexislativo para presentar o seu proxecto ante os diferentes grupos políticos e converterse así, cos previsibles apoios de PP e PSdeG --a elección debe efectuarse cunha maioría de 45 deputados--, na sucesora de Milagros Otero, cuxa renuncia se materializou a pasada semana.
En concreto, a súa dimisión produciuse case catro meses despois de que o Tribunal Supremo desestimase o seu recurso contra o fallo do Tribunal Superior de Xustiza de Galicia (TSXG) pola designación dentro da institución de María Puy, irmá do portavoz parlamentario do PPdeG e sobriña do expresidente Manuel Fraga. Tras isto, Otero vinculou a súa renuncia ao cargo a que o Parlamento acordase tanto o seu sucesor como a do vicevaledor, Pablo Cameselle.
Neste contexto, a xa candidata a nova valedora expuxo un decálogo do que será a súa achega na "loita universal polos dereitos humanos". O primeiro dos puntos que mencionou foi "o feminismo como ideoloxía que promulga a igualdade" entre homes e mulleres e que debe ser, tal e como proclamou, "o aceno de identidade" do Valedor.
MULLERES E HOMES "FEMINISTAS"
"A institución necesita de mulleres feministas fortes e de homes feministas fortes", reclamou, para despois apostar por dar "especial atención" á violencia de xénero, "manifestación máis brutal da desigualdade entre mulleres e homes". "A finalidade última ten que ser configurar o dereito fundamental a que as persoas vivan sen violencia de xénero, dereito do que xa non poderán gozar as máis de 1.000 mulleres asasinadas desde 2003, cando se empezaron a levar os rexistros", lamentou.
Tras estes dous primeiros puntos, Fernández Galiño mencionou secuelas como o "acoso" e trata " de persoas, en especial con fins de explotación sexual", e o "tráfico de órganos" como "formas contemporáneas de escravitude".
ERRADICAR A DISCRIMINACIÓN
A futura valedora aproveitou para pedir "especial atención" a colectivos económica e socialmente "desfavorecidos" e a "obrigación" dos poderes públicos para erradicar a discriminación por motivos raciais e étnicos e contra as persoas LGTBI, os mozos e os maiores.
Ademais, a maxistrada fixo referencia a retos do século XXI como os "dereitos dixitais" --entre outros, o dereito ao esquecemento e a oporse ao tratamento de datos persoais-- e o "dereito ao medio ambiente", que, ao seu modo de ver, "debe ser traído ao primeiro plano".
"Esta candidata, ao ser proposta, tomaría este decálogo como eixo de actuación sempre ao servizo da cidadanía galega", comprometeu finalmente, na que foi a súa primeira comparecencia no Parlamento de Galicia.
EN MAREA, BNG E GRUPO MIXTO
Por parte das formacións políticas, aínda que tanto PP como PSdeG reafirmaron o seu apoio a Fernández Galiño para ser nomeada valedora, o resto de grupos criticaron a "falta de consenso" á hora de designar unha sucesora para Milagros Otero. Tanto o grupo de En Marea como o mixto abstivéronse para propola como candidata, mentres que o BNG votou en contra.
O portavoz do Grupo Mixto, Luís Villares, aínda que encomiou o discurso da candidata como "unha boa carta de presentación", fixo referencia á sentenza do TSXG contra a súa sucesora, que supuxo un "menoscabo evidente" da institución estatutaria.
Pola súa banda, a deputada do BNG Montse Prado dixo "non pór en dúbida as aptitudes profesionais" da maxistrada, pero cargou contra o método de designación: "O Partido Popular presentou a súa proposta a este posto, fíxoo caendo e repetindo nos erros do pasado e facendo unha proposta de parte, exclusivamente. É unha proposta sen consenso, sen acordo, sen diálogo".
Nestes mesmos termos pronunciouse a portavoz do grupo de En Marea na comisión de peticións, Carmen Santos, quen insistiu en censurar "o procedemento" para designar a Fernández Galiño como valedora. "O noso grupo decatouse media hora antes polos medios de comunicación da súa proposta", puntualizou.
"UNHA NOVA ETAPA" NO VALEDOR
Por parte do Grupo Socialista, que apoiará a elección de Fernández Galiño, a parlamentaria Patricia Vilán instouna a "abrir unha nova etapa" na institución a pesar de que a súa sucesora no cargo fose apoiada tamén polo PSdeG. No entanto, este partido "foi o primeiro en falar da sentenza" do TSXG na Cámara e "retiraron a súa confianza" a Otero, lembrou Vilán.
Así, a socialista celebrou que falase "primeiro de feminismo", algo do que o Partido Popular, grupo maioritario no Parlamento, "non está acostuado", tal e como esgrimiu. Fronte a esta crítica, a deputada popular Paula Prado replicou afeándolle que "tente apropiarse de conquistas sociais" como o feminismo, que "existe desde antes que existise" o Partido Socialista.
Con respecto aos reproches dos outros grupos, Prado dixo "non compartir" que Fernández Galiño fose "unha proposta do PP" e eloxiou da candidata que teña "as ideas claras". Fronte a iso, aseverou que o labor da oposición sexa a de "criticar por criticar".
