Ábrese o prazo para solicitar axudas para a creación de 15 novas 'Casas Niño'

A Xunta de Galicia abre este martes e durante un mes o prazo de presentación de solicitudes para acollerse á nova convocatoria de axudas para a posta en marcha de 15 novas 'Casas Niño' no rural, unha iniciativa que forma parte do programa de apoio á natalidade da Consellería de Política Social, dirixida por Fabiola García.

Tras a publicación este luns no Diario Oficial de Galicia (DOG) da orde que regula a concesión destas subvencións, esta será a cuarta liña de axudas do programa e estará dotada con 1,1 millóns de euros que "permitirán consolidar a rede de recursos de conciliación no rural".

As 'Casas Niño' son un recurso gratuíto para as familias destinado á atención de nenos de entre tres meses e tres anos de idade nos concellos de menos de 5.000 habitantes nos que non exista ningún outro servizo de atención continuada á infancia de 0 a 3 anos.

Na actualidade a Xunta subvenciona 61 'Casas Niño', o que supón 305 prazas, pero estima que esta cifra aumentará ata 76, cun total de 380 prazas, coa nova convocatoria.

"O programa de Casas Niño deste ano conta con importantes novidades con respecto ao anterior. A principal é o incremento da contía do anticipo por atención educativa que perciben as persoas promotoras do recurso no primeiro ano, que pasa do 35% ao 100% da subvención que lles corresponda. Para as sucesivas anualidades sobe do 35% ao 75%", destacou o Goberno galego.