O BNG critica que haxa xuíces imprudentes que "tramitan denuncias contaminadas politicamente"
Afea a Jácome que usase as denuncias contra o goberno bipartito "para gañar apoio electoral" tras o arquivo dunha denuncia contra un ex concelleiro nacionalista.
Por Europa Press / Redacción | SANTIAGO DE COMPOSTELA | 31/07/2019 | Actualizada ás 21:30
O BNG de Ourense criticou ao actual alcalde de Ourense, Gonzalo Pérez Jácome, por empregar durante a súa etapa na oposición as denuncias contra o goberno bipartito "para gañar apoio electoral" usando "artimañas e calumnias".
Tamén censurou que ditas demandas fosen xestionadas "con tan manifesta imprudencia" por parte dos xuíces, que "tramitaron denuncias contaminadas politicamente". "Investigacións que se poderían resolver no ámbito Contencioso-Administrativo e que deixaron aos concelleiros inhabilitados durante todos estes anos", indica o Bloque no seu comunicado.
A formación frontista na Cidade das Burgas emitiu un comunicado este mércores, horas despois de coñecerse a sentenza que absolve ao exconcelleiro do BNG Andrés García Mata dun delito continuado de prevaricación administrativa no denominado caso Bedoya, que levara aos tribunais o entón portavoz do grupo municipal de Democracia Ourensá, Gonzalo Pérez Jácome, actual alcalde de Ourense.
"Non hai nada máis rexeitable en política que chegar a gobernar un concello á conta de usar a mentira e a farsa", apuntou o portavoz nacionalista na corporación oruensana, Luís Seara, que lembra que se trata da segunda absolución nos últimos días para un edil do goberno bipartito.
E é que, hai só 20 días, outro caso denunciado por Democracia Ourensá, a xestión do servizo de axuda a domicilio no Concello de Ourense entre 2007 e 2010 tamén recibiu carpetazo da Audiencia Provincial, que estimou recursos presentados, entre outros, pola exconcelleira de Benestar Social Marga Martín, do PSOE, por entender que "non queda debidamente acreditada a perpretación de delito algún".
