Os 41 municipios sen banco poderían dispoñer de caixeiros entre finais de 2019 e principios de 2020
A Fegamp aposta por "ir máis aló" e impulsar oficinas físicas con atención periódica en función do tamaño do concello.
Por Europa Press / Redacción | SANTIAGO DE COMPOSTELA | 02/08/2019 | Actualizada ás 15:34
O Goberno galego estima que a entrada en funcionamento de caixeiros automáticos nos 41 municipios galegos onde non existen sucursais bancarias poderá arrincar entre finais de 2019 e principios de 2020 para solucionar a situación dos 52.000 habitantes afectados pola exclusión financeira.
O conselleiro de Facenda, Valeriano Martínez, e o presidente da Federación Galega de Municipios e Provincias (Fegamp), Alfredo García, reuníronse para abordar o proxecto de servizos financeiros. Ao termo do encontro, o presidente da Fegamp apostou por que estas medidas para evitar a exclusión financeira de habitantes, sobre todo de zonas rurais, vaia "máis aló", para ofrecer unha atención presencial en cada un dos concellos para resolver trámites financeiros que, sobre todo os máis maiores, "non poden solucionar" a través dos caixeiros ou das aplicacións bancarias móbiles.
O presidente da Fegamp avogou por que os establecementos que se habiliten para ofrecer servizos de atención física abran de forma periódica en función do tamaño do concello e do número de habitantes.
Pola súa banda, Valeriano Martínez sinalou que coa instalación dos caixeiros se dará solución a "trámites diarios" como a "subtracción de efectivo, actualización de cartillas, operacións bancarias" que moitas persoas teñen que realizar nos municipios veciños porque non contan con servizos financeiros nas súas localidades.
O presidente da Fegamp especificou que primeiro debe "reunirse cos concellos" para que as localidades tomen a decisión de acollerse a ela e unha vez feito isto, en setembro formalizarase por escrito a actuación.
Valeriano Martínez engadiu que este proxecto se acometerá "canto antes", polo que en outubro a Xunta prevé licitar no Diario Oficial de Galicia dita medida e dispor de todos os caixeiros entre finais deste ano e principios do próximo nos concellos.
Ante estes prazos, o conselleiro incidiu en que o Goberno autonómico terá todos os "preparativos internos listos" para axilizar o proceso e que, no caso de que se dean atrasos, estes deberíanse a "complicacións dos concellos" ao ter que "adoptar determinadas decisións", que poden alongarse "unha ou dúas semanas".
FINANCIAMENTO
Por outra banda, o financiamento do plan de servizos e atención financeira contará cunha achega "moi maioritaria" da Xunta, pero "non exclusiva", explicou Valeriano Martínez.
Neste sentido, o conselleiro non especificou a repartición de porcentaxes, pero si que asegurou que o Goberno galego contribuirá "maioritariamente" e os concellos pagarán a cota restante.
Pola súa banda, as entidades bancarias "xa se puxeron en contacto" coa Xunta e presentaranse a un "concurso público" para facerse coas adxudicacións dos servizos financeiros.
