Galicia perdeu o dobre de empresas en xuño que a media do estado

O número de novas sociedades mercantís baixou un 14,9% en xuño en Galicia en relación co mesmo mes do ano anterior, ata 286, co cal o descenso foi case o dobre que o rexistrado pola media das comunidades (-8,5%), segundo os datos que publica este martes o Instituto Nacional de Estatística (INE).

Tamén se reduciron e máis que a media as disolucións de empresas na comunidade galega, un 15%, ata 68, delas 47 de forma voluntaria, catro por fusión e 17 doutro tipo. As 286 novas empresas implicaron a subscrición de 16,42 millóns de euros e o desembolso dunha cifra case idéntica, pero algo inferior (16,38 millóns). Foron dúas sociedades anónimas (por 1,34 millóns subscritos e case 1,3 desembolsados) e 284 sociedades limitadas (por 15,08 millóns tanto de subscrición como de desembolso).

Ampliaron capital 94 sociedades, por valor de 116,2 millóns. Delas, dous eran sociedades anónimas (e ampliaron capital por 94,66 millóns aproximadamente) e 92, limitadas (por 21,55 millóns). Fronte a isto, as reducións de capital afectaron a 12 compañías, cun capital subscrito de 10,23 millóns. Desembolsou dividendos unha empresa, por 3.000 euros.

DATOS ESTATAIS

No conxunto estatal, o número de novas sociedades mercantís baixou un 8,5% o pasado mes de xuño respecto ao mesmo mes de 2018, ata sumar 7.433 empresas, á vez que as disolucións empresariais caeron un 8,4%, ata totalizar 1.255. Co retroceso de xuño, a creación de empresas encadea tres meses consecutivos de retrocesos interanuais despois de que en abril baixase un 1,5% e en maio un 2,8%.

O 20,9% das sociedades mercantís que se crearon en xuño dedícase ao comercio e o 15,8% a inmobiliarias, financeiras e seguros. En canto ás sociedades disoltas por actividade económica principal, o 21,4% correspondeu a comercio e o 16,4% a construción.

Para a constitución das 7.433 empresas creadas en xuño subscribíronse máis de 286 millóns de euros, o que supón un descenso do 28,1% respecto ao mesmo mes de 2018, mentres que o capital medio subscrito, que se situou en 38.548 euros, caeu un 21,5% en taxa interanual.

MADRID E CATALUÑA LIDERAN

As comunidades con maior número de sociedades mercantís creadas en xuño son Comunidade de Madrid (1.801), Cataluña (1.383) e Andalucía (1.222).

Pola contra, as que menos sociedades crearon son A Rioxa (39), Cantabria (63) e Comunidade Foral de Navarra (65).