Por Europa Press / Redacción | SANTIAGO DE COMPOSTELA | 07/08/2019 | Actualizada ás 11:57
En Marea instou ao Goberno de Sánchez e á Unión Europea (UE) a "desbloquear a situación" do barco da organización Proactiva Open Arms, que se atopa "á deriva" no Mar Mediterráneo, tras rescatar 121 inmigrantes o pasado 1 de agosto.
O grupo galego criticou que "non haxa ningún movemento oficial" por parte das institucións españolas e europeas para ofrecer un "porto seguro" ao buque da organización para que poida desembarcar aos inmigrantes que cruzaban o Mediterráneo, entre os que hai máis de 30 menores de idade, segundo sinalou En Marea nun comunicado este mércores.
En concreto, a formación política explicou que o Open Arms se atopa en augas internacionais, a 24 millas da costa da illa de Lampedusa (Italia). Con todo, tanto Malta como Italia xa "blindaron" os seus portos e desde a Comisión Europea tampouco se ordenou a recolocación das persoas rescatadas en ningún peirao.
Neste sentido, En Marea criticou a "criminalización da solidariedade" no Mediterráneo, xa que a UE "se pon de perfil" e, pola súa banda, outros executivos como o de Pedro Sánchez "descarta" acoller á embarcación.
Precisamente este barco partiu de Barcelona o pasado abril, cando se comprometeu a non realizar labores de rescate a cambio de conseguir a autorización do Goberno central para navegar.
Tras o sucedido en augas internacionais o pasado xoves, o buque incumpriu o acordo e enfróntase a unha multa de ata 900 mil euros por desobedecer á Administración española. Ao mesmo tempo, o ministro italiano Mateo Salvini ameazou a organización Open Arms con outra sanción de 50 mil euros se o barco penetra en zona marítima de Italia.
"SITUACIÓN DE EMERXENCIA"
Ante a situación, que En Marea cualifica "de emerxencia", o grupo político reivindicou que "esas 121 persoas non poden esperar máis" e que a actitude dos gobernos "é intolerable". Ademais, asumiron as palabras do fundador de Proactiva Open Arms e aseguraron que "o Sahara e o Mediterráneo son as auténticas cámaras de gas do século XXI".
Desta maneira, a formación reclamou o desbloqueo do Open Arms e insistiron en que a "axuda humanitaria e solidaria entre seres humanos non pode ser ilegal" nin "criminalizarse en ningún caso".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.