Localizado un peregrino que desaparecera o pasado mércores no Pino

A Policía Nacional localizou a un peregrino de orixe estadounidense que desapareceu o pasado o mércores e que foi visto por última vez nun albergue do Pedrouzo, no concello do Pino.

O 112 Galicia informou dos sucedido este xoves e sinalou que o home foi atopado na Praza de Galicia, en Santiago, "desorientado e nervioso". Ademais, os servizos de emerxencias aseguraron que padece "algúns problemas de saúde". Por ese motivo, a pesar de "o seu bo estado físico", os axentes pediron a colaboración dos servizos sanitarios de urxencia para sometelo a unha revisión un centro médico.

O 112 Galicia explicou que ao redor das 16,00 horas deste xoves unha chamada de Protección Civil de Santiago, que tamén participaba no operativo de procura, avisou da localización do peregrino americano que percorría o Camiño en compañía dun amigo e do que perderon a pista onte nun albergue do Pedrouzo.

Pola súa banda o compañeiro do peregrino perdido acudiu ás forzas da orde, ao darse conta da súa falta, para comezar unha busca que finalizou na tarde deste xoves coa aparición do home na propia meta do Camiño. Ademais dos axentes da Policía Nacional, prestaron a súa colaboración os voluntarios de Protección Civil e os profesionais de Urxencias Sanitarias 061, que asistiron ao peregrino unha vez localizado.

Peregrinos no Camiño de Santiago. XUNTA - Arquivo