O concello coruñés equiparará o tamaño do trofeo feminino e masculino do Teresa Herrera
Actualmente existe unha diferenza notable entre os trofeos entregados aos vencedores dos torneos: a figura para as mulleres galardoadas mide ata 50 centímetros menos.
Por E.P. | SANTIAGO DE COMPOSTELA | 10/08/2019 | Actualizada ás 18:13
O Concello da Coruña afirmou de que nas próximas edicións do Trofeo Teresa Herrera se equiparará o tamaño do galardón que se entrega nas competicións feminina e masculina.
Actualmente existe unha diferenza notable entre os trofeos entregados aos vencedores dos torneos. En concreto, a figura -unha réplica da Torre de Hércules- mide ata 50 centímetros menos que a que se entrega na competición masculina.
De feito, o pasado ano saltara a polémica nas redes sociais e nalgúns medios de comunicación tras a entrega de trofeos aos entón vencedores da competición, os equipos feminino e masculino do Athletic Club de Bilbao.
O executivo dirixido por Inés Rey xa avanzou que o próximo ano equipararán as dimensións de ambos os trofeos e explicaron que os deste ano xa estaban contratados previamente polo anterior goberno, dirixido pola Marea Atlántica con Xulio Ferreiro á fronte.
A alcaldesa da Coruña, Inés Rey, e parte da corporación municipal, recibiron este mediodía no Pazo de María Pita aos representantes desta 74 edición, e aludiu á imaxe das mulleres no fútbol.
Rey considera que "elas piden un continente do tamaño do seu talento, e o estadio ten que ser tamén a súa casa". Desde o concello informan de que por primeira vez na historia "dúas mulleres coruñesas da liga Iberdrola entregarán un trofeo ao segundo clasificado do Teresa Herrera masculino".
A alcaldesa, o representante de Estrella Galicia, Ignacio Olavide, a concelleira de Turismo, Diana Cabanas, e a árbitra coruñesa Eugenia Sil, entregarán estes trofeos para cada unha das clasificacións.
Os galardóns para as modalidades feminina e masculina serán entregados á mellor xogadora e o mellor xogador Estrella Galicia, á segunda e segundo clasificado e á gañadora ou gañador. O trofeo de fútbol entregarase tras os partidos Deportivo Abanca-UDG Tenerife, que se disputará ás 18:30 horas, e o RC Deportivo-Real Betis Balompé, ás 21:00 horas.
