As catro persoas atacadas por un can no Bolo atópanse "fóra de perigo"
Está previsto que a muller trasladada de urxencia en helicóptero ao CHUO reciba o alta en breve. O animal tamén tentou atacar aos membros do Seprona que intentaron prendelo.
Por Europa Press / Redacción | SANTIAGO DE COMPOSTELA | 12/08/2019 | Actualizada ás 13:34
A muller de 47 anos que foi evacuada en helicóptero medicalizado ao Complexo Hospitalario Universitario de Ourense (CHUO) despois de ser atacada xunto con outro tres persoas máis por un can mastín no Bolo (Ourense) "evoluciona favorablemente" e espérase que pronto reciba o alta", informaron fontes próximas á investigación a Europa Press.
De feito, as catro persoas que este domingo resultaron feridas atópanse " fóra de perigo", segundo informaron fontes de emerxencias. A irmá da muller trasladada a Ourense xa recibiu o alta no hospital comarcal de Valdeorras. No entanto, aínda "presenta molestias" e deberá acudir a facer as curas durante un tempo.
BAIXO VIXILANCIA
O suceso ocorreu o domingo na parroquia de Santa María de Valdanta, no municipio ourensán do Bolo, onde o can atacou ás dúas fillas dos seus donos, á parella dunha delas e a unha veciña.
Segundo confirmou a Europa Press o alcalde do Bolo, Manuel Corzo, o can atópase na canceira da Rúa, onde permanecerá vixiado uns días á espera de que no marco da investigación se que facer con el.
IDENTIFICACIÓN
O Seprona de Ourense presentará dilixencias no Xulgado de Primeira Instancia e Instrución nº1 de Trives polas lesións producidas polo can, segundo informou a Europa Press o tenente do Seprona. Nestes momentos, os axentes atópanse recompilando toda a información sobre o accidente que afectou ás dúas fillas dos propietarios do can, á parella dunha delas e a unha veciña.
En canto á responsabilidade, esta recaería en primeiro lugar sobre o propietario, que "ten o deber de custodia do animal e é responsable dos danos que xere", segundo explicou o tenente. As responsabilidades poden levar unha multa ou tamén incorrer na vía xudicial.
A pesar de que tres dos afectados son familiares dos propietarios do can, "está a falarse dunhas lesións que son perseguibles de oficio", segundo explicou o tenente, no caso de que os familiares decidisen non interpor unha denuncia.
O CAN NON ESTABA CORRECTAMENTE IDENTIFICADO
Segundo trasladou o Seprona a Europa Press, o can "non estaba identificado correctamente" ao non ter o microchip implantado. Ata o lugar do feito se trasladadora compoñentes do Seprona de Ourense, o Xefe de Servizo de Patrimonio Natural da Xunta, axentes facultativos ambientais do mesmo servizo e voluntarios de Protección Civil que conseguiron capturar ao animal despois de "bastante tempo".
O can mostrouse agresivo cos efectivos traslados ata o lugar dos feitos e tentaron atacalos en varias ocasións.
Nun dos intentos por capturar ao animal, o mastín tratou de atacar ao Xefe de Servizo de Patrimonio Natural pero "grazas á rápida intervención dun compoñente da patrulla de Verín que se interpuxo co lazo evitouse ter un ferido máis", segundo o tenente do Seprona.
Logo de conseguir reter ao animal durante un tempo nun habitáculo, finalmente fornecéuselle un produto anestésico para adormentalo e poder manexalo con seguridade. A continuación, efectuouse o traslado á canceira da Rúa, onde se atopa nestes momentos. Os efectivos do Seprona van pór os feitos en coñecemento da autoridade xudicial e será ela mesma a que determine o destino do animal.
