475 quilos de cocaína incautados á organización desmantelada en Pontevedra
Foron detidas 14 persoas que se dedicaban ao narcotráfico en España e Portugal.
Por Europa Press / Redacción | Santiago de Compostela | 16/08/2019 | Actualizada ás 10:38
A Garda Civil desarticulou unha organización criminal dedicada a introducir cocaína por vía marítima procedente de Sudamérica para despois distribuíla en distintos lugares da Península Ibérica, e incautouse de 475 quilos de cocaína e máis de mil plantas de marihuana. No marco da 'operación Mansalva', os axentes detiveron a 14 persoas, das cales 11 foron arrestadas en Pontevedra, dúas en Valencia e unha en Portugal, segundo informou o Ministerio de Interior.
Nos nove rexistros levados a cabo, a Garda Civil interveu ademais 12.000 euros en efectivo, 12 teléfonos satelitais, unha plantación 'indoor' de marihuana con máis de mil plantas, catro vehículos dotados de dobres fondos e un remolque dotado dun sofisticado sistema hidráulico de ocultación, no que a organización chegou a trasladar máis de 300 quilos de cocaína.
As investigacións iniciáronse o ano pasado, cando axentes da Garda Civil especializados na loita contra o crime organizado tiveron coñecemento da existencia dun grupo delituoso asentado en Pontevedra, integrado por persoas con antecedentes por narcotráfico.
En xullo do ano pasado, a investigación frustrou a entrega de máis de 300 quilos de cocaína que fora trasladada desde Galicia ata Valencia. Alí interveuse a droga nun garaxe da localidade valenciana de Quart de Poblet, cando estaba a ser custodiada por dous membros da organización, que foron detidos nese momento.
Posteriormente, os avances na investigación frustraron en Portugal outra entrega de 175 quilogramos de cocaína, que fora trasladada desde a provincia de Pontevedra. A Policía Judiciaria do Porto e a Garda Nacional Republicana incautaron esta partida nas inmediacións da localidade portuguesa de Coimbra e detivo a persoa que transportaba a droga.
MEDIOS AVANZADOS
Os detidos utilizaban medios técnicos avanzados e móbiles satelitais para evitar ser detectados e investían importantes cantidades de diñeiro en tecnoloxía, para obter comunicacións seguras e detectar medios de investigación policiais.
A 'operación Mansalva' está dirixida polos Xulgados de Instrución número 1 e 3 de Quart de Poblet e contou coa coordinación das fiscalías Antidroga de Valencia e Pontevedra, así como coa colaboración do ECO de Alacante, as Unidades Orgánicas de Policía Xudicial e a Comandancia da Garda Civil de Pontevedra e Cádiz, a Unidade de Seguridade Cidadá (USECIC) e o Servizo Cinolóxico.
