O PSdeG pide a Feijóo que explique a súa estratexia electoral "agora que o PP se entregou aos pactos coa ultradereita"

O secretario xeral do PSdeG, Gonzalo Caballero, pediu este domingo ao presidente da Xunta, Alberto Núñez Feijóo, que explique a súa estratexia electoral "agora que o PP se entregou aos pactos coa ultradereita sen complexos".

Durante a súa visita á Festa da Malla do concello lucense de Meira, o líder dos socialistas galegos referiuse ao pacto entre o Partido Popular e Vox na Comunidade de Madrid, que permitiu a Isabel Díaz Ayuso converterse na presidenta autonómica.

"O PP acaba de mostrar en Madrid que está entregado aos intereses da ultradereita de Vox e que vai pactar con esa ultradereita sempre que sexa necesario para conseguir os votos e chegar aos gobernos. O PP de Pablo Casado e de Cayetana Álvarez de Toledo abandonou a moderación, o centro político e a mesura", lamentou Gonzalo Caballero.

Neste contexto, pediu a Feijóo que explique a súa estratexia electoral e que "diga aos galegos se vai ser o representante dos intereses de Vox en Galicia". Tamén solicitou ao presidente da Xunta que aclare se vai integrarse nunha fórmula de 'España suma' que incorpore todas as dereitas, a pesar de que o vicepresidente do Executivo galego, Alfonso Rueda, descartou esta semana un proxecto desas características en Galicia, xa que "o PP sempre conseguiu a confianza maioritaria dos galegos".

"Os socialistas imos combater dialecticamente e politicamente contra o PP que pacta con Vox e contra esa forza de ultradereita que supón un retroceso para os avances do país", sentenciou Gonzalo Caballero.