Ana Pontón critica os "graves problemas de seguridade viaria" da estrada PO-308
Acusa á Xunta de facer "partidismo cutre coas depuradoras" e non preocuparse pola rexeneración integral da Ría de Pontevedra.
Por Europa Press / Redacción | SANTIAGO DE COMPOSTELA | 22/08/2019 | Actualizada ás 16:49
A portavoz nacional do BNG, Ana Pontón, visitou este xoves o Concello de Poio, onde mantivo un encontro co equipo do goberno municipal para abordar a alternativa á estrada PO-308 ao seu paso por Combarro, afectada por unha gran intensidade de tráfico que provoca "graves problemas de seguridade viaria".
"Nós pensamos que a seguridade viaria é un dos temas pendentes neste país", sinalou Ana Pontón. Ademais, anunciou que "en canto se retome a actividade parlamentaria" ten previsto instar á Xunta a que licite "na maior brevidade posible" o proxecto de mellora da PO-308.
Igualmente, explicou que pedirán "que haxa unha alternativa de futuro", en referencia á proposta do goberno local de Poio de construír unha nova estrada que dea acceso aos núcleos máis importantes de poboación, quedando a PO-308 como unha travesía urbana cunha densidade de tráfico moi reducida e cun carácter máis local. Así mesmo, Pontón, comentou na súa visita deste xoves, atenderá á demanda para que a Praza da Chousa sexa de titularidade municipal.
FESTA DO MAR
A portavoz nacional do BNG, xunto á tenente de alcalde do Concello de Poio, Marga Caldas, visitou o pantalán de embarcacións tradicionais do Club Mariño a Reiboa e mantiveron un encontro co colectivo Armadiña Rock e representantes do sector da produción de mexillón.
Pontón finalizou a súa visita cun percorrido pola carpa da Festa do Mar en Combarro, onde destacou a importancia deste evento que celebra o seu decimonovena edición "reivindicando a cultura mariñeira", así como o movemento económico que xera este sector en Galicia.
Neste contexto, Pontón denunciou sigan "tendo problemas graves de contaminación na Ría de Pontevedra, concretamente ENCE e os problemas de depuración e saneamento", do que ha corresponsabilizado á Xunta e ao Goberno do Estado. Finalmente, a portavoz do Bloque acusou á Xunta de facer "partidismo cutre co tema das depuradoras" e non preocuparse, dixo, pola rexeneración integral desta ría.
