Galicia competirá nas olimpiadas de FP de Rusia defendendo a súa tradición en pan e ebanistería
Dous alumnos galegos compiten nas olimpíadas de Formación Profesional, WorldSkills 2019, en Rusia
Por E.P. | SANTIAGO DE COMPOSTELA | 23/08/2019 | Actualizada ás 11:53
Dous alumnos galegos compiten desde este venres nas olimpíadas mundiais de Formación Profesional, WorldSkills 2019, que se celebran desde o 22 ata o 27 de agosto en Kazán (Rusia).
Os participantes son Yamila Sidati Novo, en representación do CIFP Paseo das Pontes, e Brais Mosquera Fuentes, do CIFP Someso, que gañaron a medalla de ouro no campionato SpainSkills 2019 nas especialidades de Panadaría e Ebanistería, respectivamente.
Yamilda Sidati, acompañada da súa titora, enfrontarase aos representantes doutros 18 países na especialidade de Panadaría. Brais Mosquera, que tamén viaxa acompañado do seu titor, participará en Ebanistería contra mozos de 29 países distintos.
A Xunta de Galicia indica nunha nota de prensa que ambos os alumnos contan co respaldo da Consellería de Educación durante a súa participación nas WorldSkills 2019, na que participan máis de 1.300 competidores de 63 países distintos, en 56 'skills' ou especialidades.
