A Cidade da Cultura inaugura 'Stay here', desigualdades sociais sen posibilidade de ascenso

A presentación coincidiu co peche do noveno Encontro de Artistas Novos 2019.

Por Europa Press / Redacción | SANTIAGO DE COMPOSTELA | 29/08/2019 | Actualizada ás 17:46

Comparte esta noticia

O artista sevillano Alejandro Ginés inaugurou este luns na Cidade da Cultura 'Stay here', unha obra escultórica que representa as desigualdades entre os estratos sociais. Ginés é o gañador do V Concurso de Intervencións Artísticas nas Torres Hejduk, convocado entre os participantes do Encontro de Artistas Novos (EAN) 2018, unha iniciativa na que creadores emerxentes teñen a oportunidade de dar a coñecer os seus traballos e debater sobre arte contemporánea.

'Stay here' está dividida en tres niveles distintos nos que, a medida que se ascende, vólvese máis difícil o acceso. Desta forma Ginés fai "unha analogía ás desigualdades entre os estratos sociais". A peza, agora emprazada nas Torres Hejduk, está formada por unha estrutura de madeira en forma de torre cunha escaleira no seu interior e coroada por unha cadeira. O artista asegurou que "a propia cinética da obra contén a forza da mensaxe".

O director xeral de Políticas Culturais, Anxo Lorenzo, asistiu ao evento e na súa intervención destacou que as Torres Hejduk son un espazo "pouco convencional e moi emblemático" que se presta á instalación de obras como 'Stay here'.

A inauguración coincidiu co peche do noveno Encontro de Artistas Novos 2019. Desta forma, Lorenzo lembrou que, a partir deste xoves, os artistas emerxentes que participaron no EAN teñen de prazo ata o 14 de outubro para presentar un proxecto para a próxima edición, xa confirmada para agosto de 2020.

DÉCIMO ANIVERSARIO DEDICADO AO XACOBEO

Como sinalou Anxo Lorenzo, o ano que vén celebrarase o décimo aniversario do Encontro de Artistas Novos e a sétima edición do Concurso de Intervencións Artísticas nas Torres Hejduk, que estará vinculado ao Camiño de Santiago.

O director xeral de Políticas Culturais animou aos presentes a presentar iniciativas relacionadas co Xacobeo que non perdan a "esencia de experimentación e axitación do encontro de artistas". Esta proposta de vincular o Camiño co EAN está relacionada coa proximidade do Xacobeo 2021 e a posibilidade de achegar "ideas creativas" á ruta xacobea.

O director xeral de Políticas Culturais, Anxo Lorenzo, xunto ao artista sevillano Alejandro Ginés, na presentación de 'Stay here'. XUNTA
O director xeral de Políticas Culturais, Anxo Lorenzo, xunto ao artista sevillano Alejandro Ginés, na presentación de 'Stay here'. XUNTA | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta