Por E.P. | SANTIAGO DE COMPOSTELA | 05/09/2019 | Actualizada ás 19:03
O vicepresidente da Deputación da Coruña, Xosé Regueira, e representantes dos concellos de Ames, Brión, Santiago, Teo, e Val do Dubra, participaron este xoves nunha nova reunión do Consello Director de Compostela Rupestre, en que se tomaron decisións con respecto aos traballos a desenvolver nos próximos meses de face a avanzar na consolidación do parque.
Na reunión, celebrada no Concello de Santiago de Compostela, incorporáronse ao proxecto representantes dos novos gobernos municipais e asumiu a presidencia rotatoria o tenente alcalde de Ames, David Santomil.
O encontro do Consello Director de Compostela Rupestre pecha o seu primeiro ano en que a presidencia, de carácter rotatorio en función da poboación dos municipios, residiu no Concello de Santiago para pasar ao de Ames.
Ademais, o grupo experimentou máis cambios na súa constitución derivados das eleccións municipais deste ano e na reunión participaron a concelleira de Santiago Mercedes Rosón, as concelleiras de Teo Maite Argibay e Iria Otero, o alcalde de Val do Dubra, José Manuel Varela, a tenente alcalde de Brión, Yolanda Bouzas e o tenente alcalde de Ames, David Santomil. Ademais, asistiron membros do Consello Asesor e persoal técnico e de investigación.
O proxecto ten como obxectivo, entre outros, diversificar a oferta turística por medio do "importante tesouro patrimonial rupestre deste territorio" e achegar aos veciños este legado "de especial interese", así como "difundir, protexer e pór en valor os petróglifos do cinco concellos e outros elementos de gran valor", sinalou o vicepresidente e responsable das áreas de Patrimonio e Turismo, Xosé Regueira.
Na reunión presentouse a páxina web de Compostela Rupestre, que suporá unha das principais ferramentas de difusión do parque e ofrecerá información e imaxes sobre o conxunto arqueolóxico, descrición dos petróglifos máis importantes e rutas para coñecer o patrimonio rupestre do territorio. A páxina, que estará operativa proximamente, inclúe máis de duascentas fotos e información histórica e práctica do conxunto patrimonial do cinco concellos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.