Badaladas pola prevención do suicidio
O Movemento Galego da Saúde Mental convoca un acto simbólico en Santiago para concienciar sobre a necesidade de actuacións que se encamiñen a previr esta problemática.
Por Europa Press / Redacción | SANTIAGO DE COMPOSTELA | 09/09/2019 | Actualizada ás 16:33
Este martes, coincidindo co Día Mundial da Prevención do Suicidio, o Movemento Galego da Saúde Mental convoca o acto simbólico en Santiago para concienciar sobre a necesidade de actuacións que se encamiñen a previr esta problemática.
En concreto, as 'Badaladas pola prevención do suicidio' terán lugar ás 20,00 horas na compostelá Praza da Quintana. Trátase dun acto aberto a toda a cidadanía que servirá de recordo das persoas falecidas por suicidio, de apoio e afecto aos seus achegados, de sensibilización social e de visibilización pública.
Ademais, os organizadores buscan esixir ao Goberno galego un "compromiso firme e continuado" e reivindicar a posta en marcha de accións eficaces e de medios necesarios para a súa concreción, máis aló da redacción de plans, protocolos e decretos.
A campaña 'Badaladas pola prevención do suicidio' mantívose no ano 2016 ata conseguir o compromiso do Goberno galego para a elaboración do Plan Galego de Prevención do Suicidio (publicado en 2017).
A pesar deste plan, os integrantes do movemento aseguraron que seguen "esperando a publicación do cronograma de execución do mesmo, o orzamento plurianual asignado e a previsión de incremento de dotación profesional necesario".
"O plan segue baseándose case exclusivamente no ámbito sanitario e a evidente infradotación de persoal tradúcese nunha presión asistencial que impide realizar unha atención sanitaria integral, multidisciplinar, en condicións idóneas de tempo, duración ou intensidade", lamentan.
TELÉFONO DA ESPERANZA
Por outra banda, este martes tamén se trasladará a Santiago unha campaña informativa do Teléfono da Esperanza co obxectivo de achegar esta situación á sociedade e eliminar o "estigma".
Baixo o lema 'Eu tamén son vulnerable', a campaña pretende mobilizar, sensibilizar e demostrar "o carácter universal do sufrimento humano", para motivar a quen o necesite a pedir axuda. A mesa informativa estará na intersección entre Montero Ríos e Xeneral Pardiñas entre as 17,00 e as 21,00 horas.
