O Sergas recrimínalle ao Concello de Caldas non ceder un terreo gratuíto para un novo centro de saúde
A Consellería de Sanidade explica que algunhas parcelas propostas polo Consistorio reúnen as condicións técnicas para este proxecto, pero o Sergas necesita a cesión "gratuíta" do terreo, "actuación que lle corresponde ao Concello".
Por E.P. | SANTIAGO DE COMPOSTELA | 11/09/2019 | Actualizada ás 19:19
O Sergas considera "prioritario" dotar a Caldas de Reis dun novo centro de saúde, pero critica que segue á espera de que o Concello ceda un terreo "libre de cargas e gravames" para executalo.
Nun comunicado, a Consellería de Sanidade explica que algunhas parcelas propostas polo Consistorio reúnen as condicións técnicas para este proxecto, pero o Sergas necesita a cesión "gratuíta" do terreo, "actuación que lle corresponde ao Concello".
Apunta que así se lle comunicou nun escrito remitido ao alcalde o pasado mes de marzo, "co fin de iniciar o procedemento para a cesión gratuíta do terreo ao considerar imprescindible a construción dun novo centro de saúde".
O Servizo Galego de Saúde sostén que non recibiu resposta a este requirimento, a pesar de que no escrito achegábase un borrador do convenio para que faga as alegacións que estime oportunas.
