O Concello da Coruña adoptará medidas xudiciais para reclamar a Casa Cornide, en mans dos Franco
Apoio por unanimidade a que o goberno coruñés se some á demanda polo Pazo de Meirás.
Por Europa Press / Redacción | A CORUÑA | 12/09/2019 | Actualizada ás 18:46
A corporación municipal da Coruña aprobou, por unanimidade, unha moción do BNG na que se solicita que o Consistorio interpoña unha demanda xudicial para reclamar a restitución ao concello herculino da titularidade da Casa Cornide, propiedade agora da familia do ditador Francisco Franco.
A mesma moción insta o goberno coruñés a que a administración local compareza como "parte interesada" na demanda formulada pola Avogacía do Estado para "recuperar" o Pazo de Meirás.
A esta moción presentáronse dúas emendas, unha por parte de Marea Atlántica que o BNG aceptou para expor que se faga partícipe das xestións ao Consello da Memoria Democrática, e outra do PP, que non saíu adiante.
Por unanimidade, como ocorreu con outros asuntos nos que foi o primeiro pleno ordinario da nova corporación, tamén se deu luz verde a unha moción dos nacionalistas expresando o apoio aos traballadores de subcontratas de R contra a deslocalización. Ademais, aprobouse, coa única abstención de Ciudadanos, unha moción presentada polo PP sobre o uso dos terreos portuarios da cidade.
