Monumento a 25 antifascistas asasinados polo franquismo no Val da Limia
O Comité pola Memoria Histórica do Val da Limia impulsa a homenaxe.
Por Galicia Confidencial | A Limia | 14/09/2019 | Actualizada ás 19:49
Un colectivo en defensa da memoria histórica inaugurou este sábado un monumento, que se situará na estrada comarcal OU-1201, en Bande (Ourense), que pretende honrar a memoria de 25 persoas que foron represaliadas durante a Guerra Civil e a ditadura franquista na comarca ourensá e rescatalos “do esquecemento”.
Con este acto, o comité pretende “rescatar do deliberado esquecemento uns episodios históricos que cambiaron violentamente o noso pasado máis recente” e que consideran que “seguen condicionando o presente e hipotecando o futuro”, sinalan desde o Comité pola Memoria Histórica do Val da Limia, promotor desta iniciativa.
Un dos integrantes deste comité, David Pérez, dixo que a iniciativa é froito dun “longo proceso aínda inconcluso de investigación sobre as consecuencias da brutal represión exercida a partir de 18 de xullo de 1936 contra esta comarca”.
O monólito, duns tres metros de altura, elaborado polo artista Diego Currás “O Rixón”, inclúe “o nome e data de execución dos 25 antifascistas”, sobre os que o comité ten constatación documental, aínda que, Pérez precisou a Efe que son “moitas máis” as vítimas represaliadas nesta zona da provincia ourensá.
Entre os nomes que figuran nesta lista, atópanse Juan Manuel Álvarez “Noches” ou Jenaro Alonso Santos, “os dous primeiros antifascistas da comarca dos que temos constancia” e que morreron os días 29 e 30 de xullo de 1936, respectivamente, explicou.
