Por Europa Press / Redacción | Santiago de Compostela | 20/09/2019 | Actualizada ás 15:53
O novo presidente do Tribunal Superior de Xustiza de Galicia (TSXG), José María Gómez y Díaz-Castroverde, apelou a non permanecer "impasibles" ante a violencia de xénero, especialmente na contorna rural, e pediu aos xuíces ser "especialmente sensibles" e "eficientes" ante estes casos.
Ademais, instounos a cambiar "a percepción social" sobre a independencia dos membros da adxudicatura. "O cambio de percepción social da nosa independencia, non nolo van a regalar, é algo que depende de nós, somos os xuíces e xuízas, un a un, unha a unha, quen temos que cambiar esa inercia", expuxo en alusión á opinión existente a este respecto na cidadanía.
No seu discurso, incidiu na protección de colectivos vulnerables e, en particular, na violencia sobre a muller. "É unha secuela social ante a que non podemos permanecer impasibles", dixo lembrando o "atroz" triplo crime de Valga (Pontevedra).
"Trátase dunha realidade inaceptable e os xuíces somos garantes do Estado, compétenos aplicar a lei, pero nesta materia debemos ser especialmente sensibles e eficientes", sentenciou. No caso do rural, subliñou que "os silencios e o sufrimento en soidade son aínda maiores".
"Exploraremos a lei orgánica, ata onde neste momento é posible, para xerar áreas comarcais ou territoriais que permitan unha rápida resposta a este problema", dixo o novo presidente do TSXG.
Por outra banda, na súa intervención, apelou a ser "imaxinativos á hora de contemplar outra organización territorial", ao considerar "superada" a dos partidos xudiciais. Ademais, referiuse ao ámbito da transformación dixital da Administración de Xustiza, da que asegurou que é "esencial e prioritaria" para mellorar o funcionamento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.