En Marea segue explorando unha lista galega para as eleccións do 10N
Tamén recoñece estar "en contacto permanente" coa "contorna" de Compromís e Más Madrid.
Por Europa Press / Redacción | SANTIAGO DE COMPOSTELA | 24/09/2019 | Actualizada ás 12:58
O portavoz de En Marea, Luís Villares, recoñeceu que o seu partido aprobou o pasado sábado inciar negociacións con forzas de Galicia para crear unha candidatura galega para as eleccións xerais do 10N. Pero tamén sinalou que non se pechan outras portas e está "en contacto permanente" coa "contorna" de Compromís e Más Madrid para explorar a posibilidade de selar unha alianza de cara ás eleccións xerais do próximo 10 de novembro.
En declaracións á Cadea Ser recollidas por Europa Press, Villares asegura que o acordo aprobado o pasado sábado pola dirección de En Marea recolle abrir negociacións con forzas galegas e tamén "permite" establecer "un diálogo con outras forzas progresistas do Estado" que compartan unha "axenda social e democrática" que poña o foco "en programa e orzamentos e non en cadeiras de brazos e simpatías".
Uns 'mínimos' dentro dos que, segundo Villares, entran tanto o proxecto que lidera Íñigo Errejón como os valencianos Compromís, cuxa dirección se inclinou por unha alianza con Más Madrid.
Cuestionado sobre se existen conversacións con estas forzas para sumar á alianza a En Marea --convertido en proxecto político en solitario desde comezos de anos tras a súa ruptura con Podemos, EU e Anova--; o maxistrado en excedencia afirma que manteñen contactos con ambas as formacións. "Estamos en contacto permanente con todo a contorna duns e doutros para buscar como articular este diálogo", sinalou Villares.
