Por E.P. | SANTIAGO DE COMPOSTELA | 24/09/2019 | Actualizada ás 13:42
O grupo británico Immaculate Fools porá o broche final á celebración do I Foro Internacional da Economía e a Cultura Rural (Ficrural) cunha actuación que terá lugar este sábado, día 28 de setembro, ás 22,00 horas. Previamente, ás 20,30 horas, actuarán os pontevedreses Broke Lord.
Así o explicou o director de Ficrural, Aser Álvarez, nunha rolda de prensa celebrada este martes no Concello compostelán para avanzar na programación dos próximos días e na que tamén estiveron o concelleiro de Medio Rural, José Manuel Pichel, e o propio vocalista de Immaculate Fools, Kevin Weatherill.
O director deste foro internacional, que arrincou xa o pasado domingo 22 coa súa inauguración no Centro Sociocultural A Graza, explicou que o seu obxectivo "básico" é "a reactivación do rural de Santiago e da súa comarca" cunha oferta "para toda a familia".
Ademais, Álvarez indicou que Ficrural, desde unha perspectiva de "crise mundial" do ámbito agrario e de emerxencia climática, buscará "unir" ambas as loitas: "Ou reactivamos as zonas rurais para que interactúen cos centros urbanos, ou senón será moi difícil achegar solucións sustentables a medio e longo prazo".
Así, o director erixiu a este evento de carácter internacional como un "proxecto piloto" que arrinca na capital galega pero ten visión de "exportala a outros rurais, primeiro a nivel comarcal e despois a nivel provincial".
FESTIVAL DE CINEMA RURAL
Ademais dos xa mencionados concertos, Ficrural preparou para os próximos días proxeccións de entre 10 minutos e media hora enmarcadas no V Festival de Cinema Rural de Galicia, no que ademais haberá un premio especial do público en cuxa votación poderán participar os asistentes ás distintas sesións.
Este inclúe a nova iniciativa 'Ficrural na Escola', que ao longo da semana leva aos colexios algúns filmes finalistas ou premiados de anteriores edicións do festival de cinema. A programación do Ficrural inclúe tamén debates sobre iniciativas políticas no rural, coa presenza dos grupos con representación no Parlamento galego e na corporación municipal; ademais de mesas redondas sobre proxectos innovadores e emprendedores no agro.
Aser Álvarez destacou tamén que esta primeira edición busca "romper estereotipos" e "darlle visibilidade ás mulleres" do rural. Neste ámbito, o artista galego Joseba Muruzábal realizará un mural cunha muller como protagonista e que se poderá coñecer ao final do evento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.