Por Europa Press / Redacción | Ourense | 24/09/2019 | Actualizada ás 15:59
Os xulgados de Ourense dispoñen dunha sala Gesell especialmente adaptada para a declaración de testemuñas vulnerables en condicións de protección e privacidade. Trátase dun espazo pioneiro en Galicia polo seu emprego de métodos telemáticos para a comunicación entre a zona de exploración e a de observación, con accesos distintos.
A Xunta de Galicia ten como obxectivo continuar coa instalación deste tipo de dependencias noutros edificios xudiciais, segundo explicou este martes o vicepresidente do Goberno autonómico, Alfonso Rueda, durante a súa visita á sala Gesell instalada na cidade das Burgas.
O espazo conta cunha zona de exploración e outra de observación con accesos distintos e conectados mediante un sistema de videoconferencia. Con este tipo de declaracións o que se pretende, destacou a Xunta, é evitar a revictimización ou a xeración de momentos traumáticos ás testemuñas menores de idade e a outras persoas especialmente vulnerables como, por exemplo, as vítimas de violencia de xénero.
"Estes espazos pretenden facilitar, no posible, os trámites xudiciais aos que máis o necesitan proporcionándolle un lugar cun ambiente amigable e familiar", manifestou Alfonso Rueda. "Trátase de crear unha xustiza máis humana", engadiu.
Ademais, o uso desta sala permite que as testemuñas declaren mo ámbito xudicial unha soa vez, de forma que se evita á vítima repetir unha e outra vez o relato dos feitos, sobre todo en delitos de especial gravidade como os de natureza sexual.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.