Por E.P. | SANTIAGO DE COMPOSTELA | 27/09/2019 | Actualizada ás 14:49
O Concello de Santiago arrinca o proceso de compra pública innovadora para a súa cidade intelixente, 'Smartiago', polo que deberá ter executados 2,1 millóns de euros en 2021 da primeira fase do proxecto (dun global de máis de seis millóns, con fondos europeos), un obxectivo que o alcalde, Xosé Antonio Sánchez Bugallo, considera "difícil" de cumprir.
En rolda de prensa, Bugallo lamentou que este proxecto é o de maior "preocupación" pola ausencia de fondos executados no anterior mandato do goberno de Compostela Aberta. Unha cuestión pola que considera necesario realizar un "sobresforzo" para cumprir tempos nesta primeira fase. Para iso, actualizaranse pregos e ampliaranse para a súa mellora.
Ademais, o alcalde considera unha oportunidade que o deseño da futura 'Smartiago' coincida co fin dos contratos dos servizos a redeseñar, mentres avisa de que "non pode pasar o que pasou nos últimos anos, que as cousas se caeron a cachos".
As empresas SILO e Rede2Rede encargaranse da oficina técnica para levar a cabo o proceso de compra pública innovadora no que se sairá ao mercado para conseguir melloras nos servizos e aforros de custos en tres liñas: xestión de residuos urbanos, mobilidade e iluminación. Respecto diso, Antonio López, de SILO, destacou esta iniciativa "pioneira", co "enfoque tan singular dunha 'smart city' nunha cidade patrimonio".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.