'Invisibles', o espectáculo dramático para visibilizar a violencia machista, chega este domingo á Estrada
A obra articúlase ao redor da novela homónima de Montse Fajardo e presenta ante o público sete testemuños reais cun fío común entre eles: a violencia machista.
Por E.P. | PONTEVEDRA | 28/09/2019 | Actualizada ás 12:23
A Deputación de Pontevedra leva este domingo, 29 de setembro, á localidade da Estrada, o espectáculo dramático 'Invisibles', da compañía Redrum Teatro, para visibilizar a violencia machista.
O evento, que se celebrará no Teatro Principal da Estrada a partir das 19,00 hotas, terá unha duración aproximada de 90 minutos e porá no punto de mira a invisibilidade que sofren os culpables de agresións machistas en contraposición coa exposición á que ven abocadas as vítimas ante a sociedade.
O espectáculo 'Invisibles', dirixido por Marián Bañobre, articúlase ao redor da novela homónima de Montse Fajardo e presenta ante o público sete testemuños reais cun fío común entre eles: a violencia machista. A obra, coproducida por Redrum Teatro, o Centro Dramático Galego, a Concellaría de Igualdade de Pontevedra e a Deputación da Coruña, recibiu nos XXIII Premios de Teatro María Casares tres galardóns.
