Galicia, con cinco mortos, entre as CCAA con máis falecidos por afogamento en setembro no Estado
O país rexistrou ata o mes de setembro 41 falecidos por afogamento.
Por E.P. | SANTIAGO DE COMPOSTELA | 01/10/2019 | Actualizada ás 10:29
Galicia, con cinco mortos por afogamentos, sitúase entre as autonomías que rexistraron máis falecidos por esta causa o pasado mes de setembro, do total de 49 ocorridos en toda España.
Galicia rexistrou ata o mes de setembro 41 falecidos por afogamento, o que supón o 11,5 por cento dos 356 contabilizados en toda España.
En total, a cifra de mortes por afogamento nos espazos acuáticos españois nos nove primeiros meses do ano ascende a 356 persoas, o que supón un aumento do 17,5 por cento respecto ao mesmo período de 2018, ao rexistrarse 53 falecementos máis.
Segundo o Informe Nacional de Afogamentos (INA) que elabora a Real Federación Española de Salvamento e Socorrismo, recollido por Europa Press, durante o último mes perderon a vida 49 persoas, tres menos que na mesma mensualidade do ano precedente, polo que setembro se sitúa "como o segundo peor mes do último quinquenio", indicou a entidade.
Só o ano pasado, con 52 vítimas contabilizadas en setembro, supera á cifra rexistrada en 2019; o que supón 19 máis respecto de 2017; un total de 13 máis que en 2016 e dous sobre os datos de 2015, cando a Federación Española comeza a realizar esta estatística.
No que respecta aos óbitos producidos no últimos trinta días, seis comunidades autónomas destacan ao rexistrar máis de oito de cada dez afogamentos mortais; Comunidade Valenciana sobresae ao sumar 11, seguida de Andalucía e Cataluña con sete en cada territorio e as Illas Baleares, Canarias e Galicia, con cinco en cada rexión.
Outros tres contabilizáronse en Castela-A Mancha e un en Asturias, Cantabria, Castela e León, A Rioxa, Melilla e Rexión de Murcia, segundo reflicte o informe.
No conxunto do ano, as comunidades autónomas con máis persoas afogadas en setembro coinciden coas de maior número de vítimas anuais. Comunidade Valenciana ten 57, o 16 por cento do total; Cataluña (47), o 13,2%; Andalucía (43), o 12,1%; e Galicia (41), o 11,5%.
Séguenlle Canarias (34), Castela e León (23), Cantabria (18), Illas Baleares (17), Rexión de Murcia (15), Asturias (13), Aragón e País Vasco (11 cada unha), Castela-A Mancha (8), A Rioxa (6), Estremadura (5), Comunidade de Madrid (4) Navarra (2) e Melilla (1), mentres que en Ceuta non se rexistraron óbitos por esta causa.
PERFIL
En canto ao perfil, o 37,1 por cento das persoas afogadas no que vai de ano tiñan 65 ou máis anos, porcentaxe que ascende a 69,7 se se suman os tramos de idade a partir de 45 anos, é dicir, case sete de cada dez, indicou a Real Federación Española de Salvamento e Socorrismo. En setembro, este tramo de idade supuxo 37 dos 49 óbitos, o 75,5%.
Os menores de 18 anos representan, ata final deste mes, o 7,6 por cento, 27 casos, dez deles entre os 11 e os 17 anos, dos cales ningún se deu este último mes.
No global de 2019, as características da persoa afogada refírense a un home (78%), de nacionalidade española (76%), que perde a vida ao longo do tramo horario que comprende entre as 10.00 e as 20.00 horas (75,2%), en praias (45%) e en calquera caso en zonas onde non estaba activo ou non existía o servizo de socorrismo (78%).
