Denuncian despedimentos no servizo de extinción antes do fin do período de alto risco
CCOO insta a Medio Rural a cubrir o cento por cento das prazas, especialmente nos distritos forestais con maior índice de actividade incendiaria.
Por E.P. | SANTIAGO DE COMPOSTELA | 01/10/2019 | Actualizada ás 19:18
CC.OO. denunciou despedimentos no servizo de extinción de incendios da Consellería de Medio Rural antes do fin do período de alto risco, xa que "o departamento autonómico non renovará as adscricións temporais por funcións de superior categoría, que na actualidade están a ocupar multitude de bombeiros forestais".
Nun comunicado, avisa de que isto supón unha redución "neta" do operativo antes de esgotar o período previsto ata o 15 de outubro, con "moitas" prazas cubertas por persoal interino que deberán cesar no seu posto.
A este respecto, explica que esta decisión reducirá a operatividade do dispositivo "ata nun 20 por cento" nos equipos de primeira intervención, de forma que "porá en grave risco a seguridade e saúde de todas as traballadoras e traballadores do servizo, ademais de aumentar o tempo de reacción na extinción de incendios forestais". Haberá unha redución de vixiantes fixos en torres e nos centros de coordinación.
As adscricións de superior categoría son un dereito regulado no artigo 39 do Estatuto dos Traballadores e no propio artigo 15 do convenio sobre as condicións de traballo do persoal laboral da Xunta de Galicia. Este convenio establece tamén, no artigo 7, que a praza deixada vacante por este persoal ou polo que o substitúa cubrirase por contratación temporal, explica o sindicato.
Por todo iso, Comisións Obreiras insta a Medio Rural a cubrir o cento por cento das prazas, especialmente nos distritos forestais con maior índice de actividade incendiaria. Así mesmo, pide a reactivación dos procesos de promoción dos traballadores, de maneira que non se cese a ningún traballador do servizo de extinción.
