Por E.P. | SANTIAGO DE COMPOSTELA | 01/10/2019 | Actualizada ás 21:24
Unha delegación chinesa da provincia de Cantón, entre expertos en residuos e responsables de organizacións, visita estes días diversas localidades de Pontevedra onde se implantou o sistema Revitaliza de compostaxe para "aprender e adaptar" ao seu país este modelo de tratamento de residuos sólidos.
A portavoz da delegación, Chen Yimei, sinalou que o tratamento de residuos en China a través da compostaxe redúcese a un dous por cento, aínda que pode resultar "útil en zonas de cidades como Beijing ou Xangai" se se dan as condicións de "espazo e desexo por parte das comunidades de facelo".
Nesta visita tamén estivo a consultora e experta en tratamento de residuos sólidos, Jiao Tang, quen explicou durante a recepción oficial ofrecida na Deputación de Pontevedra que o interese por Revitaliza e a provincia de Pontevedra xurdiu por mediación do consultor galego experto en compostaxe Ramón Plana, con quen traballara. A súa intención é visitar outros lugares en Europa onde tamén está implantado este sistema.
Na súa primeira xornada en Pontevedra, a delegación chinesa visitou tres composteros, un en Ribadumia pertencente a un restaurante e dous de tipo comunitario, onde Chen Yimei observou "detalles do proceso e ferramentas interesantes". Para a dirixente chinesa, o Goberno do seu país está "a reducir o uso de fertilizantes químicos" debido á degradación do terreo; é un dos motivos polos cales "a compostaxe pode ser unha solución", precisou.
Pola súa banda, o vicepresidente da Deputación e responsable do desenvolvemento de Revitaliza, César Mosquera, referiuse ao tratamento dos residuos como un "problema mundial" e, ante o interese por parte desta delegación "de alto nivel" procedente de Cantón, afirmou que lles "anima a seguir o mesmo camiño" na súa xestión.
Nese sentido, a presidenta da Deputación, Carmela Silva, asegurou que o organismo provincial é unha "referencia" nesta material a nivel mundial, á vez que eloxiou que "hai que ser valentes", en alusión a Mosquera, para abordar o que cualificou como unha "aventura" para realizar o tratamento dos residuos sólidos "de maneira sustentable".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.